بلوچ یکجھتی کمیٹی ءَ چہ بلوچستان ءِ جتائیں ھنداں چار بلوچ ورنا مھمد پرید بلوچ، مھمد انور بلوچ، پزیر بلوچ ءُ کریم جانءِ زوریں بیگواھی ءَ پد آیانی لاشانی چگل دیگ ءِ سر ءَ بژن درشان کرتگ ءُ گوشتگ کہ اے ویل بلوچستان ءَ برجاھیں درکانودی کاروائی ءُ انسانی ھکانی لگتمالیانی نوکیں منانک اَنت۔
آئی ءَ گوشتگ کہ دکی ءِ ھند کلی ازگر الی جنگل ءِ جاہ منندیں پرید بلوچ ءِ آزار داتگیں لاش 6 پروری 2026 ءَ دزکپتگ۔ آ چار جون 2025 ءَ چہ گس ءَ آوار جنگ ءُ بیگواہ کنگ بوتگ۔ پہ آئی آجوئی ءَ کھول ءَ داں ھشت ماہ ءَ جھد کرتگ بلے چہ سرکار ءِ نیمگ ءَ ھچ وڑیں ھال دیگ نہ بوتگ۔
آئی ءَ گوشتگ کہ ھمے وڑ ءَ ھمے ھند کلی ازگر الی ءِ جاہ منندیں مھمد انور بلوچ چار جون 2025 ءَ چہ نماز ءَ پد مسیت ءِ دیم ءَ آوار جنگ بوتگ ءُ ھپت ماہ ءَ پد چار جنوری 2026 ءَ آئی لاش چگل دیگ بوتگ۔ انور بلوچ یک جپاکیشیں مردمے آئی کوش بلوچستان ءَ برجاھیں ریاستی زوراکیانی درچ اِنت۔
بی وائی سی ءَ گوشتگ کہ پنجگور ءِ ھند وشبود ءِ جاہ منند ایں پزیر بلوچ 25 نومبر 2025 ءَ ریاستی کشندہ ٹولی ءِ کارمنداں آوار جتگ۔ دو ماہ ءِ زوریں بیگواھی ءَ پد 7 پروری 2026 ءَ آئی آزار داتگیں لاش چہ وشبود ءَ دزکپتگ۔
آئی ءَ گوشتگ کہ پزیر بلوچ ءِ جان ءَ سکا آزارانی نشان گندگ بوتگ اَنت کہ اے ھمے گپ ءِ منانک اِنت آ بندیگ جاہ ءَ باز آزار دیگ بوتگ۔
بی وائی سی ءَ گوشتگ کہ ڈرائیور کریم جان تربت ءِ جاہ منند اِنت کہ 3 جنوری 2026 ءَ چہ اسٹار پلس مارکیٹ ءَ سادگ پوشاکیں کارمنداں آوار جتگ۔ کھول ءِ گوشگ اِنت چہ آئی آوار جنی ءَ پد مارا آئی بابت ءَ ھچ ھال دیگ نہ بوتگ۔ یک پروری 2026 ءَ آئی لاش چہ پنجگور ءِ ھند بالگتر ءَ دزکپتگ۔
بی وائی سی ءَ اے چاریں ویل بلوچستان ءَ برجاھیں انسانی ھکانی لگتمالی لیک اتگ ءُ گوشتگ کہ زوریں بیگواھی، درکانودی آوار جنی، آزار دیگ، درکانودی کوش یک مھکمیں پالیسی یے ءِ رنگ ءَ دیم ءَ آرگ بوتگ۔ چہ ایشی لس شھری، دھکانکار، مزدور ءُ ورنا درس سانمند اَنت۔
آئی ءَ گوں اکوام متھدہ، ایمنسٹی انٹر نیشنل، ھیومن رائٹس واچ ءُ آدگہ میان استمانی ادارھاں لوٹ کرتگ کہ آ بلوچستان ءَ زوریں بیگواھیانی بابت ءَ دلجمیں وڑے ءَ پٹ ءُ پول بہ کن اَنت ءُ درکانودی کوش ءَ زمہ واراں جست بہ کن اَنت۔ گوں سانمندیں کھولاں انساپ بہ کن اَنت۔
بی وائی ءَ گوشتگ کہ میان استمان ءِ بے تواری اے زوراکیاں گیش کمک کنت۔
بنشون: درشان اکس: مونوگرام
