بلوچ یکجھتی کمیٹی ءِ سروک سمی دین بلوچ ءَ وتی درشان ءَ گوشتگ کہ بلوچستان ءَ زوریں بیگواھی ءِ وڑیں مزنیں انسانی جیڑہ ءَ برے دروگ ءُ پندل لیکگ ءَ اَنت ءُ برے گوشگ بیت کہ اے مردم بیگواہ نہ اَنت بلکیں کوہ ءَ شتگ اَنت، ءُ برے اے جیڑہ ءِ جند ءَ نہ من اَنت۔ یک ھپتگے ءِ میان ءَ ھمے سرکاری جھگیرانی نیمگ ءَ جتائیں کینگداریں درشان دیگ بیت۔
آئی ءَ گوشتگ کہ دہ روچ پیش مزن وزیر ءَ گوشتگ کہ دو پروری ءَ پد کس زور بیگواہ کنگ نہ بیت۔ اے درشان وت راستی ءِ منگ اِنت کہ بلوچستان ءَ چہ سالاں زوریں بیگواھی بوگ ءَ اِنت۔
سمی دین ءَ گوشتگ کہ ایشی پژدر ءِ یک ھپتگے ءَ پیش وزیر کواجہ آسپ ءَ گوشتگ کہ زوریں بیگواھی تچک ءَ دروگ اَنت ءُ ایشی ءَ ھچ وڑیں بنیاد نیست۔ وھدے کہ پاکستان ءِ وزیر کانود آزم نزیر تارڈ ءَ شمبے ءِ روچ ءَ ھمے جار جتگ کہ سرکار پہ زور بیگواھیں مردمانی جیڑہ ءِ گیشتریں پٹ ءُ پول ءَ یک نوکیں پترے ٹھین ایت۔
آئی ءَ گوشتگ کہ زی آسمہ جھانگیر مراگش ءَ رانا سنا اللہ ءَ اے مزنیں جیڑہ نہ تھنا مرگ ءُ ھیک ءِ مسال داتگ ءُ ایشی کسان پیش کنگ ءِ جھد کرتگ بلکیں گوں تچکیں لبزاں گوشتگ کہ دانکہ بلوچستان ءَ ناشرکاری ھست زوریں بیگواھی ھم برجاہ بیت۔ چہ اے گپاں ھمے منگ بیت کہ بلوچستان ءَ زوریں بیگواھی بوگ ءُ دیم ءَ ھم برجاہ بیت۔
سمی دین ءَ گوشتگ کہ اے گپ یک انچیں جنکے ءِ دیم ءَ کنگ بوتگ کہ آئی پت گوستگیں ھبدہ سال اِنت بیگواہ اِنت ءُ آ پہ وتی پت ءِ واتری ءَ رھچار اِنت ءُ گوں ھمے جنک ءَ ھوار آدگہ بیگواھیں مردمانی کھولاں ستمبر 2022 ءَ رانا سنا اللہ ءُ آزم نزیر تارڈ ءَ شال ءَ ریڈ زون ءَ نندانک ءَ گند ءُ نند کرتگ اَت۔ ھمے گپ ءُ تران ءِ میان ءَ آئی کھولانی رنجانی سرپد بوگ ءِ گپ جتگ اَت یک پترے جوڑ کرتگ اَت ءُ گوں تچکیں لبزاں دلجمی داتگ اَت کہ دیم ءَ زوریں بیگواھی بند بیت، کجام مردم ءِ سر ءَ بھتام ھست آمیدگس ءَ پیش کنگ بیت ءُ کانود ءِ رد ءَ کیس کنگ بیت۔
آئی ءَ گوشتگ کہ بلے زی منی دیم ءَ ھمے گوشگ بوتگ کہ اگاں کسے آوار جنگ بیت آ کانود ءِ رد ءَ پیش کنگ نہ بیت۔ واکداری ءِ گپ کنگ بیت، اے وت یک مزن وزیرے ءَ رد کنگ ءَ اِنت۔
سمی دین ءَ گوشتگ کہ من یک انچیں جنکے ءَ آں منی پت زور بیگواہ کنگ بوتگ، گڑا من اے اوست ءَ مدار آں کہ مئے آزیز آئین ءُ کانود ءِ رد ءَ پیش کنگ بنت۔ وھدے کہ یک وزیرے وت آئین ءِ کاروائی ءِ سر ءَ جست بہ کنت گڑا لس شھری چہ کئے ءَ انساپ ءِ اوست ءَ بدار ایت ءُ مرچی ھما کولاں وت سرکاری درشاناں رد کنگ ءَ اِنت۔
آئی ءَ گوشتگ کہ زوریں بیگواھی ءِ جیڑہ ءِ سر ءَ ریاست ءُ ریاستی سرگردان اَنت، سرکاری جھگیر وت کینگدار ءُ سرگنوکی ءِ آماچ اَنت۔ برے اے جیڑہ ءَ سرجم ءَ رد کن اَنت ءُ برے ناشرکاری ءِ نام ءَ ھک لیکگ ءِ کوشست ءَ کن اَنت۔ بلے اے زوریں بیگواھی پہ ریاست ءِ پیشانی ءَ سیاھیں ٹکے اِنت ءُ دانکہ اے جیڑہ گوں سنگینی ءَ گیش ءُ گیوار نہ بیت ایشی سر ءَ گپ جنگ بیت، سرکاری جھگیر اے جیڑہ ءَ کجام وڑ ءَ رد کنگ یا ھک بہ لیک اَنت دانکہ اے جیڑہ گیش ءُ گیوار نہ بوتگ اے بھتام ھست۔
بنشون: درشان. اکس: رسانکدر
