شال: پہ زوربیگواھیں مردمانی پد جنگ ءَ وائس پار بلوچ مسنگ پرسنز(وی بی ایم پی) ءِ زھرشانی گدان ءَ 6074 سرجم بوتگ کہ ترندیں ھور ءُ سردی ءَ ابید شال پریس کلب ءِ دیم ءَ گل ءِ چیرمین نسراللہ بلوچ ءِ سروکی ءَ برجاہ اِنت۔
اے درگت ءَ گل ءِ چیرمین نسراللہ بلوچ ءَ تران کرتگ ءُ گوشتگ کہ مئے پرایمن ءُ راھبندی جھد داں زوریں بیگواھی ءِ سرجم ءَ ھلاسی ءُ داں بیگواھیں مردمانی آجوئی ءَ برجاہ بیت۔
آئی گوشتگ کہ مرچی زوربیگواھیں ابدلپتے بنگلزئی ءِ کھول ءَ گوں وی بی ایم پی ءَ رھوت کرتگ ءُ گوشتگ کہ ابدلپتے ء رسول بکش ءَ پاکستانی پوج ءَ 23 مئی 2014 ءَ چہ مستونگ ءِ ھند اسپلنجی ءَ آوار جتگ ءُ بیگواہ کرتگ۔
کھول ءِ گوشگ اِنت ابدلپتے ءِ زوربیگواھی ءِ کیس کمیشن ءَ داتگ کہ ابدلپتے ءَ ڈیھ ءِ ادارھانی کارمنداں آوار جتگ ءُ 2022 ءَ کمیشن ءَ ابدلپتے ءِ درگت پروڈیکشن آرڈر ھم شنگ کرتگ۔ بلے انگت نہ کہ آ آمیدگس ءَ پیش کنگ بوتگ ءُ نہ کہ کھول ءَ آئی سلامتی ءِ بابت ءَ سرپدی دیگ بوگ ءَ اِنت۔ چہ ایشی ءَ آئی کھول سکا جنجال اِنت۔
نسراللہ بلوچ ءَ گوشتگ کہ کمیشن ءِ نیمگ ءَ ھپت سد پروڈیکش آرڈر شنگ کنگ بوتگ۔ بلے انگت آیانی سر ءَ سرکار ءِ نیمگ ءَ دلگوش دیگ بوگ ءَ نہ اِنت ءُ ناں کہ کمیشن ءَ وتی شنگ کرتگیں پروڈیکشن آرڈرانی سر ءَ دلگوش دیگ ءَ کانودی کاروائی کرتگ۔ ما نبشتھی دروشم ءَ مزن آمیدگس ءَ گوشتگ کہ بیگواھیں مردمانی شنگ کرتگیں پروڈکشن آرڈرانی سر ءَ سرکار دلگوش دیگ ءَ نہ اِنت۔ مارا مزن آمیدگس ءَ دلجمی ھم داتگ کہ کمیشن ءِ شنگ کرتگیں پہ پروڈکشن آرڈرانی سر ءَ دلگوش دیگ دلجمی دیگ بیت۔ بلے یک سالے ءِ گوزگ ءَ ابید ھم انگت ءَ گامگیج زورگ نہ بوتگ۔
نسراللہ بلوچ ءَ گوں سرکار ءُ مزن آمیدگس ءَ لوٹ کرتگ کہ آ ابدلپتے بنگلزئی ءَ ھوار آدگہ درسیں زوربیگواھیں مردمانی درگت ءَ کمیشن ءِ شنگ بوتگیں پروڈکشن آرڈرانی سر ءَ زوت دلگوش دیگ بہ بیت ءُ آیانی کھولانی چہ اے جنجالاں رکینگ ءَ وتی کرد ءَ پیلو بہ کن اَنت۔
بنشون؛ درشان اکس:وی بی ایم پی
