شال: پہ زوربیگواھیں مردمانی پد جنگ ءَ وائس پار بلوچ مسنگ پرسنز (وی بی ایم پی) ءِ زھرشانی گدان 6072 روچ سرجم بوتگ کہ شال پریا کلب ءِ دیم ءَ برجاہ اِنت۔
اے درگت ءَ وی بی ایم پی ءِ چیئرمین نسراللہ بلوچ ءَ گوشتگ کہ بلوچستان کابینہ ءِ بیست ءُ دومی دیوان ءَ بلوچستان ءِمزن وزیر سرپراز بگٹی ءَ گوں ترندی ءَ ٹاپار جتگ کہ چہ یک پروری ءَ پد بلوچستان ءَ بیگواھیں مردمانی جیڑہ ھلاس بیت۔ چونیں ھم مردمے ءَ ڈیھ ءِ ادارہ دزگیر بہ کن اَنت آ زوربیگواہ کنگ نہ بیت۔ بلکیں زوربیگواھیانی درگت ءَ جوڑ کرتگیں ایکٹ 2025 ءِ رد ءَ بندیگ جاہ برگ بیت ءُ آیانی کھولاں گوں آیاں گند ءُ نند کنائینگ بیت۔
آئی گوشتگ کہ بلوچستان ءِ مزن وزیر ءِ اے درشان دروگ اَنت دو پروری ءَ بی این ایم ءِ چیئرمین ڈاکٹر نسیم بلوچ ءِ پس مھمد بکش ساجدی، ناکو نئیم ساجدی ءُ رپیک بلوچ ءَ پاکستانی پوج ءَ چہ ھب چوکی اسکائی بلیو ءَ آیانی گس ءَ آوار جتگ ءُ بیگواہ کرتگ اَنت۔ داں مرچی آ دیم ءَ آرگ نہ بوتگ اَنت ءُ نا کہ آیانی بابت ءَ کھول ءَ سرپدی دیگ ءَ اَنت۔ ھمے وڑ ءَ بلوچستان ءِ جتائیں دمگاں ھوار چہ کراچی ءَ ھم جتائیں بھرگاں سیادی داروکیں بلوچ آوار جنگ بوتگ اَنت۔بلے آ نہ آمیدگس ءَ پیش کنگ بوتگ اَنت ءُ نا کہ آیانی بابت ءَ کھولاں ھال دیگ ءَ اَنت۔
نسراللہ بلوچ ءَ مزن وزیر ءِ انوگیں درشان ءِ سر ءَ بژن درشان کرتگ کہ آئی تہ ءَ اے کول دیگ بوتگ کہ ریاست ءِ بگیری ئیں سرگرمیاں ھواریں مردمانی کھول ھم میار بار لیکگ بنت۔ اے وڑیں درشان مچی سزا ءِ گنتریں چھرگ ءَ پیش دار ایت کہ زوربیگواھی ءِ وڑیں ڈیھ ءُ جھانی انسانی ھکانی کانود ءِ بگیری اِنت۔
آئی گوشتگ کہ ڈیھ ءِ کانود ءَ اے تچک ءَ نبشتہ اِنت کہ چونیں ھم مردمے ءِ کھول ءَ آ مردم ءِ میار ءِ پژدر ءَ سزا دیگ درکانودی گامگیجے۔ ھمے سوب ءَ سرکار ءُ ڈیھ ءِ ادارھانی سروکاں زانگ لوٹ ایت کہ درکانودی گامگیج ءُ مچی سزا ءِ بنیاد ءَ شھریانی بگیری ءَ کانودی کاروائی ءَ بلوچستانءِ جاور شر نہ بنت بلکیں ھمے گامگیجانی سوب ءَ جاور روچ پہ روچ گنتر بوگ ءَ اَنت۔
بنشون؛ درشان اکس: وی بی ایم پی
