شال ءَ پہ زور بیگواھیں مردمانی آجوئی ءَ وائس پار بلوچ مسنگ پرسن ( وی بی ایم پی ) ءِ زھرشانی گدان ءَ 6070 روچ سرجم بوتگ کہ شال پریس کلب ءِ دیم ءَ انگت برجاہ اِنت۔
پنچ شمبے ءِ روچ ءَ وی بی ایم پی ءِ چیئرمین نسر اللہ بلوچ گدان ءَ ساڑی بوتگ ءُ زور بیگواھیں مھمود الی لانگو ءِ مات زھرشانی گدان ءَ اتکگ ءُ بھر زرتگ۔
مھمد الی لانگو ءِ مات ءِ گوشگ اِنت کہ منی زھگ ءِ زوریں بیگواھی ءَ سالے ءُ نیمے سرجم بوتگ اے میان ءَ من سرکار ءُ انساپ دیوکیں درسیں ادارھانی دروازگ ٹک اتگ اَنت ءُ پہ وتی زھگ ءِ آجوئی ءَ زھرشانی ھم کرتگ۔ چہ ایشی ءَ ابید نہ منی زھگ آجو بوتگ ءُ نہ آئی بابت ءَ مارا سرپدی دیگ بوگ ءَ اِنت۔ مئے سرجمیں کھول جنجالانی دیمپان اِنت۔
وی بی ایم پی ءِ چیئرمین نسراللہ بلوچ ءَ گوشتگ کہ ڈیھ ءِ کانود ءِ رد ءَ زوریں بیگواھی ءِ ھچ وڑیں گنجاھشت نیست ءُ ڈیھ ءِ کانود پہ ھمک شھری ءِ پھازادری ءَ بنکی انسانی ھکانی پھازداری ءِ دلجمی ءَ دنت۔ پمشکا اے ڈیھ ءِ ادارھانی زمہ واری بیت کہ آ گوں زور بیگواھیں مردم ءُ آیانی کھولاں کانود ءِ رد ءَ پیش بہ بنت۔ ھما شھری کہ درکانودی کارے ءَ ھوار اِنت آ زوریں بیگواھی ءِ جاہ ءَ کانود ءِ رد ءَ دزگیر کنگ بہ بنت ءُ آئی کھول پہ آیانی سلامتی ءِ بابت ءَ سرپد کنگ بہ بیت، دانکہ آ چہ رنجاں آجو بہ بنت۔
نسر اللہ بلوچ ءَ گوشتگ کہ گوں سرکار ءُ ڈیھ ءِ ادارھاں لوٹ کن آں زوریں بیگواھی ھلاس کنگ بہ بیت ءُ مھمود الی لانگو ءَ ھوار درسیں بیگواھیں مردمانی دیم ءَ آرگ ءَ وتی کرد ءَ پیلو بہ کن اَنت۔
بنشون: درشان. اکس: وی بی ایم پی
