بلوچ نیشنل موومنٹ ( بی این ایم ) ءِ انسانی ھکانی ادارہ پانک ءَ وتی درشانے ءَ گوشتگ کہ 4 پروری 2026 ءَ بالاچ بلوچ ء ھالد کہ تربت، مومن میتگ ءِ جاہ منند اِنت تیرگواری کنگ ءُ کشگ بوتگ۔
آئی ءَ گوشتگ کہ ھندی مردمانی گوشگ اِنت اے پجار نہ بوتگیں سلاہ بندیں مردم ریاستی چیر دستی ءَ کار کنوکیں کشندہ ٹولی ءِ کارمند بوتگ اَنت کہ آیاں تیرگواری کرتگ ءُ پد ءَ جستگ اَنت۔
پانک ءَ گوشتگ کہ بالاچ ءَ سنگانی سر ءِ کبرستان ءَ ھما وھد ءَ نشانگ کرتگ کہ آ اود ءَ اللہ داد واھد ءِ بیرانی ءِ بنداتی سالروچ ءِ درگت ءَ دوا لوٹگ ءَ بوتگ۔ چہ ایشی ءَ پیش بالاچ ءَ پاکستانی پوج ءَ دوبر ءَ زور بیگواہ ھم کرتگ۔
آئی ءَ گوشتگ کہ بالاچ اولی رند ءَ 25 اکتوبر 2023 ءِ شپ ءَ آوار جنگ بوتگ ءُ بیست روچ ءِ زوریں بیگواھی ءَ پد 15 نومبر 2023 ءَ یل کنگ بوتگ۔ لھتیں ماہ ءَ رند آ پد ءَ بیگواہ کنگ بوتگ ءُ رند ءَ سی ٹی ڈی ءِ دست ءَ دیگ بوتگ ءُ داں لھتیں ماہ ءَ بندیگ بوگ ءَ رند یل کنگ بوتگ۔
پانک ءَ گوشتگ کہ چہ کوش ءَ پیش بالاچ چہ ھمے کشندہ ٹولی ءِ نیمگ ءَ کم چہ کم دوبر ارش ءَ رک اتگ۔
بنشون: درشان اکس: مونوگرام
