بلوچ آجوئی لوٹوکیں رھشون ءُ بلوچستان لبریشن پرنٹ ( بی ایل ایپ ) ءِ سروک ڈاکٹر اللہ نزر بلوچ ءَ وتی درشان ءَ گوشتگ کہ وشنود کنوکیں ٹولی انچو نہ زانت اَنت کہ آ ناشرکار ءُ آجوئی زرمبشت ءِ میان ءَ پرک ءَ بہ گیشین اَنت، آ چہ بلوچ راجی گوستانک ءَ سرجم ءَ نابلد اَنت۔ شال ءِ گڈی جنگ ءِ میان ءَ گوں آجوئی لوٹوکاں مردمانی گوں شان ءُ شرپ ءَ پیش بوگ ھما ایردستانی چماں پچ کنت کہ آ پہ وتی واجھانی گوشگ ءِ پد ءَ پندل سازی ءَ اَنت۔
آئی ءَ گوشتگ کہ من گوں پنجاپ ءِ دانشور، وی لاگر ءُ مزنیں رسانکدر ءَ لوٹ کن آں کہ آ اے گپ ءَ بہ پھم اَنت بلوچ آجوئی ءِ سپاھیاں چی ءَ ناشرکار لیک اَنت، بلوچ گوں وتی اے جنگولاں مھر کنت۔ ھمے سوب اِنت کہ مردم بے ترس ءَ گْوادر ءَداں شال ءَ ھمے جنگی جاوراں ابید وتی بامرداں وش اِتک کن اَنت۔
بلوچ رھشون ءَ گوشتگ کہ دومی نیمگ ءَ پنجاپی پوج ءَ گودار ءَ ھزدار ءِ جاہ منندیں یکیں کھول ءِ سیزدہ مردم کشتگ ءُ شال ءَ ھوار آدگہ جاھاں بلوچ شھریانی سر ءَ تیرگواری کرتگ۔ نوشکے ءَ یک مساپر وینے نشانگ کرتگ کہ ایشی آسر ءَ دہ بلوچ بیران بوتگ۔ ھمے وڑ ءَ نوشکے ءَ لس آبادی ءِ سر ءَ ڈرون ارش ءَ درزنانی کچ ءَ مردم بیران بوتگ۔
ڈاکٹر اللہ نزر بلوچ ءَ گوشتگ کہ اے وڑیں گامگیج ریاستی زوراکیانی گڈی آسر اِنت ءُ پنجاپی پوج ءِ دمبرگ ءَ پیش دار ایت۔ بلوچستان ءِ نہ تھنا آجوئی ءِ جنگ کٹگ بوگ ءَ اِنت، بلکیں بلوچ راج ءِ دل ءُ ارواہ ھم کٹگ بوگ ءَ اِنت۔
بنشون: درشان. اکس : رسانکدر
