بلوچ نیشنل موومنٹ ( بی این ایم ) ءِ کارگشاد دل مراد بلوچ ءَ شھید بانک زامر بگٹی ءِ شھیدی ءِ چاردھمی سالروچ ءِ درگت ءَ گوں آئی ھوار شھید بوتگیں کسان سالیں جاناں ڈومکی ءُ آئی ڈرائیور برکت ءَ ستک شانی ندر کرتگ ءُ گوشتگ کہ پہ بلوچستان ءِ آجوئی، ازت ءُ انسانی شرپ ءَ جان ندر کنوکیں شھید نہ تھنا بلوچ راجی زرمبشت ءِ بنیاد ءَ مھکم کن اَنت، بلکیں پاکستان ءِ رستری ءُ بلوچ چکچینی ءَ پاشک کن اَنت۔
آئی ءَ گوشتگ کہ شھیدانی دیمونی تھنا گوستانک ءِ یک درے نہ اَنت، بلکیں یک زندگیں اھدے کہ ھمک پدریچ ءَ ھمے ترانگ ءَ گیج ایت کہ آجوئی ءِ راہ چہ درساں مستریں توان راستی، تمردی ءُ یکشلیں گھگیری اِنت۔
دل مراد بلوچ ءَ گوشتگ کہ 31 جنوری 2012 ءَ کراچی گزری ءَ پاکستانی پوج ءِ چیریں ادارھاں سنگر گپتگ ءُ زامر بگٹی نشانگ کرتگ۔ اے ناشریں ارش ءَ زامربگٹی، آئی سیزدہ سالی جنک جاناں ڈومکی ءُ ڈرائیور برکت شھید بوتگ اَنت۔
آئی گوشتگ کہ بانک زامر بگٹی ءِ کوش ءِ مول ھمیش بوتگ کہ آ شھید نواب اکبر ھان بگٹی ءِ نماسگ ءُ براھمدگ بگٹی ءِ گھار بوتگ بلے بانک زامر بگٹی تھنا یک گسی زالبولے نہ اَت بلکیں راجدوستی ءِ مارشت ءِ واھند ءُ بلوچ جھدکار ءُ پاکستانی پوج ءِ زوراکیانی سانمندیں مردمانی کمک کنگ ءَ سرگرمیں زالبولے اَت۔ آ مرگ ءِ دروشم ءَ سزا دیگ بوت۔
دل مراد بلوچ ءَ دیمتر ءَ گوشتگ کہ بانک زامربگٹی، آئی کسان سالیں جنک ءُ ڈرائیور ءِ شھیدی بلوچ راج ءِ بگیری ءَ مچی سزا ءِ ھمے پالیسانی بھرگ اِنت، ھمے درچ ءَ ریاست پاکستان ءَ یک زالبولے گوں جنک ءَ ھوار شھید کرتگ۔
درشان ءِ گڈی ءَ گوشگ بوتگ کہ بلوچ نیشنل موومنٹ اے درگت ءَ شھید زامر بگٹی،جاناں ڈومکی ءُ برکت شھید ءَ ستک شانی ندر کنت ءُ بلوچ راج ءَ ھمے سدکی ءَ دنت کہ شھیدیانی ھون ءُ شرپ مئے جھد ءِ بنجاہ اَنت ءُ مئے منزل بلوچ راجی آجوئی اِنت۔
