بلوچ لبریشن آرمی ( بی ایل اے ) ءِ جارکش جیئند بلوچ ءَ وتی درشان ءَ گوشتگ کہ آپریشن ھیروپ ءِ دومی بھر ءِ پارست ءَ بی ایل اے ءِ سرمچاراں انوں بلوچستان ءِ دہ جتائیں شھراں یکیں وھد ءَ ارش بندات کرتگ۔ شال، نوشکی، مستونگ، دالبندین، کلات، ھاران، گْوادر، پسنی، تمپ ءُ بلیدہ ءَ سرمچاراں شریں وڑے ءَ ساڑی بوگ ءِ ھواری ءَ لشکری ءُ انتزامیہ جاہ نشانگ کرتگ اَنت ءُ سکا تاوان داتگ اَنت۔ جتائیں شھراں کاروائیانی آسر ءَ دژمن ءِ تر ءُ گرد دارگ بوتگ ءُ باز جاھاں دژمنیں پوج پدکنز کرتگ۔
آئی گوشتگ کہ آپریشن ھیروپ ءِ میان ءَ شال، گْوادر، نوشکی ءُ دالبندین ءَ زورگریں پوج ءُ چیریں ادارھانی بنجلانی سر ءَ پدائی ارش کرتگ۔ بی ایل اے ایلٹ پدائی بھرگ مجید برگیڈ دژمنیں پوج ءِ بنجلانی تہ ءَ پترتگ ءُ مزنیں بھرانی دستیگ کنگ ءَ سوبین بوتگ۔ باز جاہ ءَ ترندیں جنگ برجاہ اَنت۔ اے کاروائیانی میان ءَ دژمن ءِ مزنیں بنجاہ زد ءَ اَنت۔
جارکش ءَ گوشتگ کہ بلوچستان ءِ آدگہ شھر ءُ ھنداں ھم سرمچار شریں وڑے ءَ پترتگ اَنت۔ مستونگ، کلات ءُ ھاران ءِ شھری ھنداں پوج ءُ پولیس پدکنز کرتگ اَنت۔ گوادر ءُ پسنی ءَ سرمچار ساڑی اَنت ءُ گوں ترندیں ارشاں دژمن داشتگ اِش، تْیاب دب ءِ دارگ برجاہ اِنت۔ تمپ ءُ بلیدہ ءَ ھم کاروائی برجاہ اَنت۔ اود ءَ دژمن ءِ ترّ ءُ گرد نشانگ کنگ بوتگ اَنت۔
آئی ءَ گوشتگ کہ اے میان ءَ کوسٹل ھائی وے ھم نشانگ ءَ اِنت، چہ ایشی آسر ءَ زورگر ءِ توان ءُ تر ءُ گرد سانمند بوتگ۔اے شھدگانی دارگ ءِ آسر ءَ دژمن ءِ ھمک روچی لشکری انتزامیہ داشتگ ءُ جتائیں جاھاں آئی ترّ ءُ گرد سرجم ءَ ھلاس بوتگ۔
جارکش ءَ گوشتگ کہ آپریشن ھیروپ ءِ دومی بھر ءَ بی ایل اے ءِ جتائیں یونٹ یک شرین ءُ مھکمیں وڑے ءَ گون اَنت۔ پتے اسکواڈ، مجید برگیڈ، چیریں بھرگ زراب ءُ ایس ٹی او ایس ( اسپیشل ٹیکٹیکل آپریشنز اسکواڈ) وت ماں وت ھواری ءَ جتائیں شھر ءُ ھنداں ترّ ءُ گرد کنگ ءَ اَنت۔
جیئند بلوچ ءَ درشان ءِ گڈی ءَ گوشتگ کہ آپریشن ھیروپ ءِ دومی بھر سرجمیں بلوچستان ءِ جتائیں ھنداں برجاہ اِنت۔ پدائیانی ھواری ءَ شھری ھند ءُ مزنیں شھدگانی سر ءَ سرمچار شریں وڑے ءَ ساڑی اَنت۔ اے میان ءَ داں انوں دژمنیں پوج ءِ درزنانی کچ ءَ کارمند مرتگ اَنت۔ گیشتریں ھال زوت رسانکدر ءَ شنگ کنگ بنت۔
