بلوچ راجدووستیں سروک رھیم بلوچ ایڈوکیٹ ءَ وتی درشان ءَ گوشتگ کہ پاکستانی پوج ءُ آئی وتگڑیں سرکار ءِ بگیری ءَ ایرادگری ءُ شرگداری میارے جوڑ بوتگ۔ کانود،آمیدگسی کار، آمیدگس پاکستانی پوجءُ آئی چیریں ادارہ وتی گچیں کرتگیں وتگڑیں سرکارانی رد ءَ ھمے مول ءَ انچو کارگرگ ءَ اَنت کہ ایرادگری کنوکاں ترسین اَنت ءُ اگاں کسے ھمے درانسانی پالیسانی سر ءَ شرگداری کنگ ءِ توکل ءَ بہ کنت آئی سر ءَ بے بن ءُ مزنیں کیس جن اَنت۔ ایڈوکیٹ ایمان زینب مزاری، ھادی الی چٹہ، ماہ رنگ بلوچ ءُ آدگہ مردمانی سزا دیگ ءُ بندیگ کنگ ھمے گامگیج ءِ منانک اِنت۔
آئی ءَ گوشتگ کہ پاکستان بلوچستان ءَ پہ زوریں بیگواھی ءُ آزاردھیانی کانودی بستار ءَ یک کانودے جوڑ کنگ ءَ اَنت۔ پاری زورگپتیں بلوچستان ءِ وتگڑیں اسمبلی ءَ ناشرکاری ءِ ایکٹ 1997 ءِ دو ترمیم من اتگ، آیانی پارست ءَ پوج ءَ شک ءِ بنیاد ءَ مردمانی آوار جنگ ءُ چیریں جاھے ءَ بندیگ کنگ ءُ آزار دیگ ءِ واک داتگ آئی ءَ وژنامیں نامے داتگ ” ڈی ریڈیکلائزیشن سینٹرز” گوشگ بیت۔ آیاں ھما دروشم ءَ آمیدگس ءَ پیش کنت اود ءَ پجار نہ بوتگیں جج کیسانی جست ءَ کنت۔ اے وڑیں کیساں پجار نہ بوتگیں گواہ بنت ءُ میار بار ءَ وتی دل دوستیں وکیل گچین کنگ ءِ ھک دیگ نہ بیت۔
رھیم بلوچ ایڈوکیٹ ءَ گوشتگ کہ زوریں بیگواھی، آزاردھی ءُ درکانودی کوشءِ وڑیں میارباری ءِ پسو دیگ ءِ جاہ ءَ ھمے سیاھیں کانود ءُ درانسانی گامگیجانی بگیری ءَ توار چست کنوک سرکار ءِ نیمگ ءَ وتساچیں دروگ ءُ نامگپتیں کیس جنگ ءُ رسانکدر ءَ پندل سازیانی دیمپان بنت۔
آئی ءَ گوشتگ کہ یورپی یونین ءُ یورپی سرکار پاکستان ءِ گون ءَ مالی، پاباری ءُ لشکری پالیسی ءُ پیسلہ کنگ ءِ وھد ءَ یا گوں آئی ءَ چونیں ھم کول ءِ وھد ءَ ھمے راستیاں الم بہ چار اَنت۔
