بلوچ اسٹوڈنٹس ایکش کمیٹی (بساک) ءَ وتی درشانے ءَ گوشتگ کہ بلوچستان ءَ زانشت ءِ دیمروئی ءُ وانگ ءِ پہ ھمک شھر ءُ میتگ ءَ سر کنگ ءَ بلوچستان کتاب کاروان ءِ کتابی میڑہ برجاہ اَنت۔ مرچی ڈیرہ مراد جمالی ءَ کتابی میڑہ ءِ دومی روچ بوتگ کہ میڑہ ءَ نودربر ءُ استاداں ھوار جتائیں بھرگاں سیادی داروک ءُ باسمائیں مردم کتاب زورگ ءَ میڑہ ءَ آتکگ اَنت۔
آئی گوشتگ کہ اے سکا بژنی گپے کہ بلوچستان پولیس ءَ زوراکی کرتگ ءُ کتاب میڑہ ءِ سر ءَ بیڑ برتگ۔ زانت بکشوکیں کتاب گوں توپک ءِ زور ءَ برتگ اَنت ءُ نودربر دزگیر کرتگ اَنت۔ کتاب بھا کنوک ءُ زانت دوستیں نودربراں انچوش آزار دیگ ءُ دزگیر کنگ بوتگ اَنت کہ گوش ئے آ اود ءَ درکانودی نشہ ءِ باپاری ءَ بوتگ انت۔
آئی گوشتگ کہ اے کتاب ڈیھ ءِ رجسٹریں شنگکارانی نیمگ ءَ شنگ بوتگیں اَنت کہ آ سرجمیں ڈیھ ءِ کتاب میڑہ ءُ دکاناں دزکپ اَنت۔ بلے بژن اِنت کہ ھمے کتاب کہ بلوچستان ءِ ورنایانی دست ءَ بنت گڑا آ گوں توپک ءِ زور ءَ پُلگ بنت۔ ءُ ورنا آزار دیگ ءُ بندیگ کنگ بنت۔
آئی گوشتگ کہ سرکار یک نیمگے وانگ ءِ اوگام جنگ ءَ دم نہ بارت ءُ دومی نیمگ ءَ چہ ورنایانی زانت دوستی ءَ ھمینکس ترس ایت کہ آیانی دست ءِ کتاب پُلگ بوگ ءَ اَنت۔ چہ ایشی ءَ ھمے پدّر بیت کہ زوراک نہ لوٹ اَنت کہ بلوچستان ءِ ورنا بوان اَنت ءُ دیمروئی بہ کن اَنت بلکیں آ لوٹ اَنت کہ ما گیش پشت ءَ بہ بہ ایں دانکہ آ گیش مئے سر ءَ واکداری کرت بہ کن اَنت ءُ وتی نپ ءَ گپت بہ کن اَنت۔ بلے اے ھچ رنگ ءَ نہ بیت کہ بلوچ ورنا چہ وانگ ءُ زانگ ءِ سپر ءَ دزکش بہ بنت۔ آ اے زانت ءِ جھد ءَ گوں مھکمی ءَ اوشت اَنت ءُ ھمک زوراکی ءِ دیم پہ دیمی ءَ کن اَنت۔
جارکش ءَ گوشتگ کہ ما اے درسیں گامگیجاں گوں ترندی ءَ ایر جن ایں ءُ لوٹ کن ایں کہ دستیگ کرتگیں درسیں کتاب دیگ بہ بنت ءُ دزگیر کرتگیں نودربر زوت یل کنگ بہ بنت۔ بلوچستان سرکار اے کتاب دژمنانی بگیری ءَ دلگوش گور بہ کنت ءُ وتی راھبندی زمہ واری ءَ پیلو بہ کنت۔
