بلوچ اسٹوڈنٹس ایکشن کمیٹی (بساک) نسیرآباد ھنکین ءِ نیمگ ءَ ڈیرہ مراد جمالی ءَ پنچ شمبے ءِ روچ ءَ اللہ والا چاراہ ءَ یک روچی کتاب میڑھے برجم دارگ بوتگ۔
اے کتاب میڑہ ءَ جتا جتائیں بنگپانی سر ءِ کتاب ایر کنگ بوتگ اَنت۔ کتاب میڑہ ءَ نودربر ءُ ٹیچراں ھوار لس مردم بازیں کچے ءَ اتکگ اَنت ءُ ہرکس ءَ وتی دل دوستیں کتاب زرتگ۔
بساک ءِ نیمگ ءَ گوشگ بوتگ کہ اے کتاب میڑہ گل ءِ نیمگ ءَ برجاھیں کتاب کاروان ءِ بھر اِنت کہ ایشی رد ءَ بلوچستان ءِ جتائیں ھند ءُ دمگاں ھوار چہ بلوچستان ءَ ڈن ھم آدگہ شھراں برجم دارگ بوگ ءَ اِنت۔
آئی ءِ گوشگ اِنت کہ اے درچ ءِ مول ورنایانی کتابانی نیمگ ءَ ھب ءُ واھگ ءِ گیش کنگ اِنت ءُ چاگرد ءِ تہ ءَ زانشتی ءُ لیکھی کارانی دیم ءَ برگ اِنت۔
چہ ایشی ءَ پیش ھم ھمے سال ءَ بلوچ اسٹوڈنٹس ایکشن کمیٹی ءِ نیمگ ءَ بلوچستان ءِ بنجاھی شھر شال ءُ بلوچستان ءِ آدگہ دمگانی ھواری ءَ کراچی ءَ ھم کتاب میڑہ برجم دارگ بوتگ اَنت۔
چہ بساک ءِ نیمگ ءَ کتاب کاروان ءِ پارست ءَ ھمک سال ءَ کتاب میڑہ برجم دارگ بوگ ءَ اَنت۔
