بلوچ نیشنل موومنٹ ( بی این ایم ) ءِ چیئرمین ڈاکٹر نسیم بلوچ ءَ ھاجی نور مھمد ءِ بیرانی ءَ دلپدردی درشان کرتگ ءُ گوشتگ کہ واجہ یک راستین ءُ راجدوستیں انسانے اَت۔ آ 1980 ءِ دھک ءَ بی این وائی ایم ءُ پد ءَ بی این ایم ءِ سرگرمیں باسکے بوتگ ءُ وتی سرجمیں زند پہ راجی جنز ءَ ندر کتگ۔
ڈاکٹر نسیم بلوچ ءِ گوشگ اِنت کہ آئی ءِ کسان سالیں چُک نمروز نور 2011 ءَ پاکستانی لشکر ءَ آوار جتگ ءُ پد ءَ شھید کتگ۔ اے ایوک ءَ پہ آئی ءِ کھول ءَ نہ بلکیں پہ سرجمیں بلوچ راج ءَ یک بیھال نہ بوؤکیں ٹپّے۔
آئی ءَ گوشتگ کہ ما چہ پاکیں ھاوند ءَ دوا کن ایں کہ ھدا مرزی ھاجی نور مھمد ءَ باگیں بھشت ءَ جاگہ بہ دنت۔
ھاجی نور مھمد مند ءِ میتگ گیاب ءِ جاہ منند اِنت کہ دوشمبے ءَ ماں کراچی ءَ بیران بوتگ۔
