بلوچ لبریشن آرمی (بی ایل اے) ءِ جارکش جیئند بلوچ ءَ وتی درشانے ءَ گوشتگ کہ سرمچاراں پَنجگُور ءِ اُرش ءَ زورگریں پاکستانی پوج ءِ دوازدہ کارمند کشتگ ءُ شش ٹپی بوتگ۔ زورگریں پوج ھما وھد ءَ نشانگ کرتگ کہ آ ھمے ھند ءَ کشندہ ٹولی ءِ کارمندانی ھواری ءَ لشکر کشی ءَ روگ ءَ بوتگ۔
آئی گوشتگ کہ زی پَنجگُور ءِ ھند سوراپ ءَ بی ایل اے ءِ سرمچاراں زورگریں پاکستانی پوج ءُ کشندہ ٹولی کارمند ھما وھد ءَ نشانگ کرتگ اَنت کہ آ بازیں کچے ءَ گاڑیانی سر ءَ ءُ پیادگ ءَ تر ءُ گرد کنگ ءَ بوتگ اَنت۔ اے وھد ءَ زورگریں پوج ءِ کمک ءَ بکتر بند گاڑی ءُ آدگہ گاڑیانی سر ءَ دگہ باز کارمنداں دیم ءَ آیگ ءِ جھد کرتگ کہ سرمچارانی دومی ٹولی ءَ آ نشانگ کرتگ ءُ پد کنزینتگ اَنت۔
آئی گوشتگ کہ نیمروچ ءِ یک ءَ داں شپ ءِ ادار ھشت ءَ برجاھیں میڑ ءَ زورگریں پوج ءِ کمانڈو اں ھوار کم چہ کم دوازدہ کارمند مرتگ ءُ شش ٹپی بوتگ۔ دژمن ءِ یک گاڑی یے تباہ بوتگ ءُ کشندہ ٹولی ءِ کارمنداں ھم تاوان بوتگ۔
جیئند بلوچ ءَ درشان ءِ گڈی ءَ اُرش ءِ زمہ واری من اِتگ ءُ گوشتگ کہ دژمن ءِ سر ءَ اُرشانی ترند کنگ ءِ کول ءَ کن ایں ءُ داں بلوچ راج ءِ آجوئی ءَ مئے جھد برجاہ بیت۔
