چہ گوادر ءَ پاکستانی پوج ءِ دست ءَ زوربیگواھیں مسدک بلوچ ءِ کھول ءَ آئی آجوئی ءِ لوٹ کرتگ۔
آئی کھول ءِ گوشگ اِنت کہ 18 جنوری 2026 ءَ مسدک بلوچ ءَ پاکستانی پوج ءَ گوں دگہ سے مردم ءَ ھوار گوادر ءِ ھند چگلی ءِ چوکی ءَ آوار جتگ کہ آیانی نام اسھاک ء ماسٹر ایسا، سئود بلوچ ء ھاجی ھسن ءُ وارس بلوچ ء گپور اِنت کہ آ پد ءَ 19 جنوری ءَ آجو بوتگ اَنت ءُ مسدک انگت ءَ بیگواہ اِنت آئی ھچ ھال نیست کہ چون ءُ کج ءَ انت۔
آئی گوشگ اِنت کہ اے مسدک ءِ چارمی رند انت کہ زور بیگواہ کنگ بوتگ ۔ اولی رند ءَ 2014 ءَ گوں وتی براس مھمد جان ءَ ھوار 10 روچ ءَ زور بیگواہ کنگ بوتگ ۔ دومی رند ءَ گوں وتی دو براس ازیز ءُ مھمد جان ءِ ھواری ءَ 2015 ءَ آوار جنگ بوتگ داں 17 ماہ ءَ زور بیگواہ کنگ بوتگ۔ سیمی رند ءَ 2020 ءَ زور بیگواہ کنگ بوتگ۔ انوں آئی چارمی رند انت کہ 18 جنوری 2026 ءَ زور بیگواہ کنگ بوتگ۔ مسدک بلوچ یک مزدورے ءُ گوں پیکپ گاڑی ءَ کار کنگ ءُ وتی کھول ء والینتگ۔
کھول ءَ گوں انسانی ھکانی ادارھاں لوٹ کرتگ کہ پہ مسدک بلوچ ءِ آجوئی ءَ وتی کرد ءَ پیلو بہ کن اَنت۔
