بلوچ نیشنل موومنٹ ( بی این ایم ) ءِ چیئرمین ڈاکٹر نسیم بلوچ ءَ ایمان مزاری ءُ ھادی الی چٹہ ءِ دزگیری ءِ پژدر ءَ وتی درشان ءَ گوشتگ کہ ایمان مزاری ءُ ھادی الی چٹہ ءِ دزگیری آجوئی ءِ گپ ءِ سر ءَ ارش اِنت۔ ایمان مزاری یک نامداریں وکیل ءُ انسانی ھکانی سرگرمیں کارکنے۔ آئی زوریں بیگواھیانی بگیری ءَ یکشل ءَ توار چست کرتگ ءُ گوں سانمندیں کھولاں اوشتاتگ کہ آیاں دیر اِنت چہ راستی، انساپ ءُ جست ءَ زبھر اَنت۔ آئی ءِ کار کانودی ءِ چیردستی ءَ پر ایمنیں جھد ءُ انسانی ھکانی میان استمانی راھبندانی پاسداری اِنت۔
آئی ءَ گوشتگ کہ ھادی الی چٹہ آئی لوگواجہ اِنت، مدام گوں زور بیگواھیں مردمانی کھولاں اوشتاتگ ءُ آیانی جھد شریں وڑے ءَ کمک کرتگ۔ آیانی دزگیری انچائیں گپے نہ اِنت بلکیں پہ ایرادگریانی دارگ ءُ انسانی ھکانی پھازدارانی میاربار پیش کنگ ءَ مھم ءِ بھر اِنت۔
ڈاکٹر نسیم بلوچ ءَ گوشتگ کہ اکوام متھدہ ءُ گیشتر یورپی یونین ءَ دزمانجنی کنگ ءُ اے درکانودی دزگیریانی بابت ءَ پاکستان جست کنگ لوٹ ایت۔ ایشی زمہ واری ءِ ارزیشت پمشکا گیش بوگ ءَ اِنت کہ یورپی یونین جی ایس پی پلس اسکیم ءِ رد ءَ اربانی کچ ءَ یورو پہ تجارتی نپانی رد ءَ پاکستان ءِ پلہ مرزی ءَ کنگ ءَ اِنت کہ اے تچک ءَ میان استمانی انسانی ھکانی کنونشنز ءِ پاسداری ءِ شرت اِنت۔ اے وڑیں بگیریانی سر ءَ بے تواری یا دزمانجنی نہ کنگ آئی ءَ گیشتر زوراکی کنگ ءَ کمک کنت۔ یورپی یونین ءِ گوں پاکستان ءَ سپارتی ءُ باپاری نزیکی ھست، پمشکا اے آئی دودمانی ءُ سیاسی زمہ واری بیت کہ آ ایمان مزاری ءُ ھادی چٹہ ءِ زوتیں آجوئی ءِ لوٹ ءَ بہ کنت۔
بی این ایم ءِ چیئرمین ءَ گوشتگ کہ چہ اے دزگیری ءَ ابید یورپی یونین پاکستان ءَ زور بہ دنت کہ آ زوریں بیگواھی ءِ پالیسی ءَ ھلاس بہ کنت ءُ پہ انسانی ھکانی جاورانی سر ءَ دلگوش گور بہ کنت۔ بلوچستان ءَ ھزارانی کچ ءَ مردم بیگواہ کنگ بوتگ اَنت، آزار دیگ ءُ درکانودی کشگ بوتگ اَنت، اے درست ریاست ءِ یل کنگ ءُ جست نہ کنگ ءِ سوب ءَ بوگ ءَ اَنت۔
آئی ءَ گوشتگ کہ انسانی ھکانی پھازدار سزا دیگ نہ بنت پھریزگ لوٹ اَنت۔ انساپ، جست گرگ ءُ بنکی آجوئی ءِ شرپ تھنا یک گچینے نہ اِنت بلکیں میان استمانی کانود ءِ رد ءَ یک ھژدری زمہ واری یے۔
