بلوچ نیشنل موومنٹ ( بی این ایم ) ءِ انسانی ھکانی ادارہ پانک ءَ بلیدہ ءِ میتگ ریکوءِ جاہ منندیں ورنا تالب ھسین ء لال جان ءِ زوریں بیگواھی ایر جتگ ءُ گوشتگ کہ 13 جنوری 2026 ءِ، شپ ءَ پاکستانی پوج ءَ بازیں کچے ءَ لال جان ءِ گس ءَ بیڑ برتگ ءُ تالب ھسین پہ زور آوار جتگ۔
آئی ءَ گوشتگ کہ ھندی مردمانی رد ءَ چہ زوریں بیگواھی ءَ پیش تالب ھسین ڈگارانی سر ءَ کار ءَ بوتگ کہ ھندی کشندہ ٹولی ءِ کارمنداں آزار داتگءُ کشگ ءِ بیھار داتگ۔ چہ آوار جنگ ءَ پد آ بیگواہ اِنت ءُ آئی بابت ءَھچ وڑیں سرپدی دیگ ءَ نہ اَنت۔
پانک ءَ گوشتگ کہ تالب ھسین ءِ زوریں بیگواھی ءَ آئی کھول سکا ترس ءُ جنجالانی آماچ اِنت۔ بیڑ برگ ءِ میانءَ زھگ ءُ زالبول گیشتر سانمند بوتگ اَنت۔
