شال: سرکاری نوکراں پہ وتی لوٹانی ھک ءَ زھرشانی کرتگ، پولیس ءَ زھرشانی ءِ سر ءَ بیڑ برتگ ءُ باز مردم دزگیر کرتگ۔
سرجمیں بلوچستان ءِ نوکری کنوکیں مردم پہ ڈسپیریٹی ریڈکشن الاؤنس ءَ زھرشانی کنگ ءَ اَنت کہ چہ ایشی سوب ءَ گیشتر سرکاری کارگسانی کار بند اَنت۔ زھرشانی ءِ سوب ءَ سرکار ءَ شال ءِ دامگ بند کرتگ اَنت کہ چہ ایشی ءِ سوب ءَ مردم سکا جنجال اَنت۔
چوش کہ آیاں پہ وتی لوٹانی ھک ءَ مرچی شال ریڈ زون ءَ زھرشانی ءَ نندگ ءِ جار جتگ اَت، ھمے درگت ءَ چہ سرجمیں بلوچستان ءَ سرکاری نوکر بازیں کچے ءَ شال آتکگ اَنت۔ بلے پہ آیانی ریڈزون ءَ نہ ھلگ ءَ کنٹینر راہ ءِ سر ءَ ایر کنگ بوتگ ءُ ریڈزون بند کنگ بوتگ۔ چہ راھانی بند بوگ ءِ سوب ءَ زھرشانی کنوک پریس کلب ءِ دیم ءَ مچ بوتگ اَنت بلے پولیس ءَ اود ءَ ھم نہ اشتگ اَنت ءُ درزنانی کچ ءَ نوکر دزگیر کرتگ ۔
پولیس ءِ اے زوراکیانی بگیری ءَ گرینڈ الائنس ءِ نیمگءَ زھرشانی زرمبشتے ءِ برجم دارگ ءِ جار جنگ بوتگ۔
