بلوچ وومن پورم ءَ وتی درشانے ءَ گوشتگ کہ پاتمہ بلوچ ءِ زوریں بیگواھی ءَ ایر جن این ءُ پہ اے جیڑہ ءَ پٹ ءُ پول ءِ لوٹ ءَ کن ایں۔
آئی گوشتگ کہ بلوچستان انسانی ھکانی گنتریں لگتمالیانی بنجاہ اِنت ، اد ءَ اے وڑیں ویل گوں ترندی ءَ بوگءَ اَنت۔ 13 جنوری 2026 ءِ شپ ءَ پاکستانی پوج ءَ نوروز اسلام ءِ لوگ بانک پاتمہ بلوچ ء مھمد جان چہ ھب چوکی ءِ ھند اکرم کالونی ءَ درکانودی آوار جتگ ۔ اے دلپدردیں ویل نوکیں ویلے نہ اِنت بلکیں بلوچ زالبولانی بگیری ءَ پاکستانی پوج ءِ نیمگ ءَ زوراکیانی برجاھیں درچ انت کہ چہ 2025 ءَ گیشتر بوتگ۔
جارکش ءَ گوشتگ کہ 2025 ءَ 12 زالبول ءِ آوارجنی ءِ کیس دیم ءَ اتکگ کہ چہ آیاں 6 انگت ءَ پاکستانی پوج ءِ زندان ءَ بندیگ اِنت کہ گیشتریں ویل چہ ھب چوکی ءَ بوتگ اَنت۔اے کاروائی پہ زانت بلوچ راجی دودمان ءُ چاگردی واک ءِ تاوان دیگ ءَ بوگ ءَ اَنت۔ زوریں بیگواھی ھمے گپ ءَ پیش دار ایت کہ سرکارکانود ءَ مانیارگ ءُ وتی زور ءَ پیش دارگ ءَ انت۔ پاتمہ بلوچ ءِ لوگ واجہ پیسر ءَ سے رند ءَ آوار جنگ بوتگ پد ءَ آجو کنگ بوتگ۔
آئی گوشتگ کہ ما اے وڑیں درسیں درکانودی ءُ بلوچ مھلوک ءِ نپانی بگیری ءَ گامگیج ءَ گوں ترندیں دانکاں ایر جن ایں۔ ما ایشی ءَ ھمک پورم ءَ رد کن ایں ءُ ایشی بگیری ءَ گھگیری ءَ برجاہ داریں۔ ما لوٹ کن ایں کہ پاتمہ بلوچ ءَ ھوار درستیں زور بیگواھیں بلوچ زالبول آجو کنگ بہ بنت۔
