ھاران شھر ءَ سلاہ بندیں مردم بازیں کچے ءَ پترتگ اَنت ءُ آیاں شھر ءِ جتا جتائیں جاھاں سنگر گپتگ ءُ دگ بند کرتگ اَنت۔
بنشون ءِ رد ءَ سلاہ بندیں مردماں شھر ءَ پولیس تانہ ءِ سر ءَ ارش کرتگ بینک ءُ آدگہ سرکاری شوربندی تاوان داتگ اَنت۔
پولیس کارمندے ءِ گوشگ اِنت کہ سلاہ بندیں مردماں پولیس کارمند تاوان نہ داتگ اَنت ءُ تانہ ءِ گاڑی ءُ سلاہ تاوان داتگ اَنت ءُ لھتیں سلاہ ھم برتگ۔ آیاں چہ بندیگجاہ ءَ بندیگ ھم یل کناھینتگ اَنت۔
انچوش گوشگ بوگ ءَ اِنت کہ سلاہ بندیں مردمانی کچ باز بوتگ کہ آیاں گوں گاڑی ءُ موٹر سائیکلاں شھر ءَ جتا جتائیں جاھاں تر ءُ گرد ھم کرتگ۔
ھمے میان ءَ پاکستانی پوج ءُ سلاہ بندیں مردمانی میان ءَ باز جاہ ءَ میڑءِ ھم ھال اِنت۔ ارشانی آسر ءَ پاکستانی پوج ءِ بازیں کچے ءَ جانی توان ءِ ھال اِنت۔
ھندی بنشون ءِ رد ءَ سلیم نامیں مردمے ءِ گس ءِ سر ءَ دو راکٹ ءِ گولا کپتگ کہ چہ گولاھانی ترکگ ءَ زھگ ءُ زالبولاں ھوار سَے مردم ٹپی بوتگ۔ ٹپی بوتگیں مردم پہ الاج ءَ نادراھجاہ ءَ برگ بوتگ اَنت۔
چوش کہ بلوچستان ءَ جتائیں ھند ءُ دمگاں پاکستانی پوج ءَ لس آبادی نشانگ کرتگ اَنت ءُ مردم بیران ءُ ٹپی بوتگ اَنت۔
اے کاروائی ءِ زمہ واری انگت ھچ گل ءَ نہ زرتگ۔
