بلوچستان لبریشن پرنٹ (بی ایل ایپ) ءِ جارکش میجر گھرام بلوچ ءَ وتی درشانے ءَ گوشتگ کہ بلیدہ ءِ ھند زامران ءَ ھشت جنوری 2026 ءِ سھب ءِ ادار دہ ءَ پاکستانی پوج ءَ گل ءِ بنجل ءِ سر ءَ ڈرون اُرش کرتگ۔ چہ ایشی ءَ بی ایل ایپ ءِ چار سرمچار شھید بوتگ۔ شھید بوتگیں سنگت ھسین پنام کمال بلوچ، اکبر پنام تاھیر بلوچ، وسیم پنام میرو بلوچ ءُ ھزیپہ پنام نودان بلوچ اِنت۔ گل وتی اے دلیر ءُ جپاکشیں سنگتاں ستک شانی ندر کنت۔
آئی گوشتگ کہ کیپٹن ھسین پنام کمال بلوچ ء ابدلگپور بلیدہ گلی چیئرمن بازار ءِ جھمنند اِنت یازدہ پروری 2021 ءَ گل ءَ ھوار بوتگ۔ ھسین پنام کمال یک دلیر ءُ جپاکشیں سنگتے بوتگ ءُ بنجل ءِ ڈپٹی کمانڈر ءِ بستار ءَ یک جوانیں کردے پیلو کرتگ۔ آئی بنجل ءِ ھیلکاری ءُ سنگراں شوربندی ھورت چاری کرتگ ءُ ھمک پیسلہ ءِ سر ءَ گوں بامردی ءَ اوشتاتگ۔ آئی سروکی ءُ مھکمی پہ سنگتاں مادنیں کشکے بوتگ ءُ گل ءِ کاروان مھکم کرتگ۔ کیپٹن ھسین پنام کمال ءِ دیمونی ءُ کردار سنگتانی توکل ءَ مھکم کنت ءُ پہ آیوکیں پدریچاں یک مسالے۔ گل مدام آئی جپا کشی ءُ دیمونیاں گیر کار ایت ءُ آئی کردار پہ مدامی زندگ مانیت۔
آئی گوشتگ کہ اکبر پنام تاھیر بلوچ ء یاکوب بلیدہ میناز ءِ جھمنند اِنت ءُ آ سیزدہ مارچ 2025 ءَ گل ءَ ھوار بوتگ۔ آ لھتیں وھد ءَ پیش گل ءِ بنجل ءَ آتکگ اَت ءُ آ گل ءِ شھری کاراں سرگرم بوتگ۔ بنجل ءَ آیگ ءَ کمیں وھد ءِ تہ ءَ وتی دلیری، جپاکشی ءَ پہ ھمک سنگت ءَ یک مسالے جوڑ بوتگ۔ آئی ھمک زمہ واری گوں پابندی ءَ سرجم کرت ءُ جتائیں سنگراں جوانیں کردے پیلو کرتگ۔ گل آئی دیمونی ءُ جھد ءَ پہ مدامی گیر کار ایت۔
جارکش ءَ گوشتگ کہ وسیم پنام میرو بلوچ ء رسول بکش دشت ءِ جھمنند اِنت ءُ دہ ستمبر 2025 ءَ گل ءَ ھوار بوتگ۔ کمیں وھد ءِ تہ ءَ گل ءِ بنجل ءَ آتکگ اَت چہ ایشی ءَ پیش آ گوں گل ءِ سنگتاں رھوت کنگ ءَ بوتگ ءُ راشن ءُ گوں آدگہ سامانانی کاراں بندوک بوتگ۔ وسیم پنام میرو وتی جھد ءُ جپاکشی ءَ پہ ھمک سنگت ءَ توکلے جوڑ بوتگ اَت۔ آئی توکل ءُ نوکیں کار ءِ دربرگ ءِ جوزگ آئی ءَ ھمک سنگر ءَ یک نامے بکش اتگ۔ آئی وتی زمہ واری گوں دل ستک ءَ سرجم کرتگ ءُ پہ ھمک کار ءَ تیار بوتگ۔ آئی دیمونی مھکمی پہ مدامی یاد کنگ بنت۔
جارکش ءَ گوشتگ کہ ھزیپہ پنام نودان بلوچ ء نور ھامد مند ءِ جھمنند اِنت ءُ دہ ستمبر 2025 ءَ گل ءَ ھوار بوتگ۔ بنجل ءَ آیگ ءَ پیش گوں سنگتاں رھوت کنگ ءَ بوتگ۔ ھزیپہ پنام نودان یک جپاکش ءُ پرز شناسیں سنگتے اَت۔ آئی چہ وتی جھد ءُ توکل ءَ پہ دربرگ ءِ جوزگ ءَ ھمک سنگت ءَ یک مسالے بوتگ۔ آئی ھمک چیز گوں ھورتی ءَ چار اِتگ ءُ ھر وھد ءَ دربرگ ءُ کار کنگ ءِ جھد کرتگ۔ آئی جھد ءُ جپاکشی پہ سنگتاں مادنیں کشکے ءُ گل ءِ کاروان ءِ مھکم کنگ ءَ آئی کردار پیش داشتگ۔
آئی گوشتگ کہ بی ایل ایپ ءِ شھیدیں سنگتاں وتی زمہ واریانی پیلو کنگ ءَ پہ وتن ءِ رکّینگ ءَ جھد ءِ بھر بوتگ اَنت۔ آیانی دیمونی ھمے پیش دار اَنت کہ زوراکی، آزاردھی ھچ راج ءِ توکل ءَ نزور کرت نہ کنت۔ دژمن ءِ زوراکی بلوچ مھلوک ءِ زانت ءُ گھگیری جوزگ ءَ کدی نزور کرت نہ کنت۔
میجر گھرام بلوچ ءَ گوشتگ کہ شھیدیں سنگتاں ستک شانی ندر کن ایں۔ دیمونی بیھال کنگ نہ بنت ءُ شھیدانی ھون آیانی جوزگ ءُ دیمونی مدام گوں بلوچ راج ءِ زانت، توکل ءُ آجوئی ءِ جھد ءَ زندگ بنت۔ اے رژن پہ ھمک آیوکیں پدریچ ءَ توکلءُ دیمونی ءِ کلوہ ءَ سر کنت۔
اے دیمونی پما پھر ءِ چیدگ اَنت ءُ ھمے ترانگ ءَ گیج اَنت کہ آجوئی ءِ راہ ارزان نہ اِنت۔ ھمے سوب ءَ جوزگ ءُ جپاکشی الّمی اِنت۔ ما وتی شھیدانی یات ءَ پہ مدامی زندگ دارین ءُ آیانی واب ءِ پیلو کنگ ءَ جھد ءَ برجاہ دار ایں۔
