بلوچ نیشنل موومنٹ ( بی این ایم ) دری کارانی تک ءِ نیمگ ءَ شنگ بوتگیں درشانے ءَ گوشگ بوتگ کہ لندن ءَ زی بی این ایم ءِ باسکانی یک ٹولی یے ءَ برتانیہ پارلیمنٹ ءِ ھاوس آپ کامنز ءَ یک ھیلکاری مراگشے ءَ بھر زرتگ۔ اے مراگش ءِ مول پارلیمانی نزام، ھما وڑ ءُ راھبندانی سرپد بوگ اَت کہ چہ آیاں برتانیہ ءَ بلوچستان ءِ بابت ءَ سرپدی دیگ ءُ پہ پلہ مرزی ءَ سوبین بوگ ءِ سوج ءَ دنت۔
آئی ءَ گوشتگ کہ چوشیں ھیلکاری مراگش بی این ایم ءِ ھما ارادہ ءِ بھر اِنت کہ آ وتی باسک ءُ آیوکیں پدریچ ءَ راھبند ءِ پارست ءَ پہ مھکم ءُ سوبمندیں سپارتکاری ءَ شیوار بہ کنت۔
آئی ءَ گڈسر ءَ برتانیہ ءِ لیبرپارٹی ءِ پارلیمنٹ ءِ باسک جان میکڈونل ءِ منت گپتگ کہ آئی ءَ اے وڑیں یک ارزشتداریں مراگشے اڈ داتگ۔
چہ ایشی ءَ پیش بلوچ نیشنل موومنٹ ءِ چیئرمین ڈاکٹر نسیم بلوچ ءَ ھم گوں برتانیہ پارلیمنٹ ءِ باسکاں گند ءُ نند کرتگ اَت، چہ آئی ءَ ابید بی این ایم ءِ باسکاں باز بر ءَ گوں برتانیہ ءِ پارلیمنٹ ءِ باسکاں گند ءُ نند کرتگ ءُ بلوچستان ءِ جاورانی بابت ءَ گپ جتگ۔
ھمے ھپتگ ءَ لندن ءَ لیبر پارٹی ءِ پارلیمنٹ ءِ باسک جان میکڈونل ءَ برتانیہ پارلیمنٹ ءَ بلوچستان ءَ انسانی ھکانی لگتمالیانی بگیری ءُ برتانیہ ءِ سلاہ ءُ آدگہ سامانانی کارمرز بوگ ءِ سر ءَ نبشتھی جست کرتگ اَت ءُ آئی جست ءِ پسو ءَ برتانیہ ءِ وزیر کرس برائنٹ ءَ گوشتگ اَت کہ برتانیہ سرکار ءَ گوں پاکستانی وزیراں انسانی ھکانی لگتمالی ءِ ترس ءِ گپ جتگ۔ برتانیہ پاکستان سرکار ءَ زور دنت کہ آ وتی آئین ءُ انسانی ھکانی میان استمانی لوٹانی رد ءَ درسیں مردمانی ھکانی مانزمانی ءَ بہ دنت۔
آئی ءَ سلاھانی رد کارمرز بوگ ءِ سر ءَ گوشتگ اَت کہ پوجی ءُ آدگہ سامانانی درسیں لائسنانی بابت ءَ برتانیہ چار ایت۔ اگاں ترس ودی بوت گڑا ھلاس کنگ یا ماٹو کنگ بنت۔
چہ ایشی ءَ ابید بی این ایم ءِ باسکاں پہ بلوچستان ءِ سپارتکاری ءَ گوں جتائیں ڈیھانی سرکاری واکدار ءُ گوں انسانی ھکانی گلاں بلوچستان ءَ انسانی ھکانی لگتمالی ءِ بابت ءَ گپ جتگ ءُ بلوچستان ءَ پاکستان ءِ زورگری ءُ آئی پوج ءِ نیمگ ءَ زوراکی پیش کرتگ اَنت۔
