شال: وائس پار بلوچ مسنگ پرسن ( وی بی ایم پی ) ءِ زھرشانی گدان ءَ شال پریس کلب ءِ دیم ءَ 6044 روچ سرجم بوتگ کہ انگت برجاہ انت۔ زھرشانی گدان ءَ گل ءِ چیئرمین نسراللہ بلوچ ساڑی بوتگ۔
یک شمبے ءِ روچ ءَ جتا جتائیں بھرگاں سیادی داروکیں مردم گدان ءَ اتگک اَنت گوں زور بیگواھیں مردمانی کھولاں ھمدردی درشان کرتگ، بلوچانی درکانودی کوش ءِ سر ءَ دل پدردی درشان کرتگ ءُ زور بیگواھیں مردمانی آجوئی لوٹ کرتگ۔
گل ءِ چیرمین نسراللہ بلوچ ءَ گوشتگ کہ زوریں بیگواھی انسانی ھکانی ءُ ڈیھ ءِ کانود ءِ بگیری اِنت پہ ھمے زوریں بیگواھیانی سوب ءَ ما گل ءِ راھبند ءَ چہ 2009 ءَ پرایمن ءُ آئین ءِ رد ءَ جھد کنگ ءَ ایں مئے مول ھمیش اِنت کہ زوریں بیگواھی ءُ درکانودی کوش بند کنگ بہ بیت۔ زور بیگواھیں مردم آجو کنگ بہ بنت اگاں کسے ءِ سر ءَ بھتامے ھست گڑا ڈیھ ءِ کانود ءِ رد ءَ آمیدگس ءَ آرگ بہ بیت آگاں بے میار انت آجو کنگ بہ بنت زور بیگواھی ءِ درچ بند کنگ بہ بیت۔ پہ زور بیگواھیں مردمانی آجوئی ءَ زوت دلگوش دیگ بہ بیت کھول چہ اے جنجالاں کشگ بہ بنت۔
