بلوچ یکجھتی کمیٹی ءَ وتی درشان ءَ گوشتگ کہ گوستگیں روچاں ڈی جی آئی ایس پی آر ءِ کانپرنس ءَ یکبرے پد ءَ ھمے تھلیں راستی پیش داشتگ کہ بلوچستان ءَ ریاستی زوراکی برجاہ اِنت ءُ ریاستی ادارہ زوریں بیگواھی ءُ درکانودی کوش ءِ وڑیں میارباریاں گوں جتائیں نیمون ءُ درشاناں راست کنگ ءِ جھد ءَ کنگ ءَ اَنت۔
آئی ءَ گوشتگ کہ اے پریس کانپرنس ءَ ھما سیاسی ءُ انسانی ھکانی گل ءُ کارکن نشانگ کنگ بوتگ اَنت کہ آ یکشل ءَ ریاستی آزاردھی، دزگیری، ایپ آئی آرءُ بیھاراں ابید پہ زوریں بیگواھی ءُ ریاستی زوراکیانی بگیری ءَ توار چست کنگ ءَ اَنت۔
آئی ءَ گوشتگ کہ بی وائی سی ءُ آئی سروک ڈاکٹر ماہ رنگ بلوچ ءِ بگیری ءَ برجاھیں پندل ھمے ریاستی پالیسیانی درچ اِنت کہ آ گوستگیں چنچو ماہ اِنت کہ گوں ترندی ءَ برجاہ اَنت۔ باز براں چہ پریس کانپرنساں بلوچ یکجھتی کمیٹی ءُ آئی سروکانی بے بنیاد ءُ دروگیں بھتام جنگ بوتگ بلے داں مرچی ھم ڈی جی آئی آیس پی آر چہ آیاں یک بھتامے ءِ راست کنگ ءَ بے سوب بوتگ۔ اے وڑیں بھتام ریاستی زوراکیانی بگیری ءَ چست بوتگیں توارانی دارگ ءِ یک کوشستے اِنت۔
آئی ءَ گوشتگ کہ بلوچستان ءَ ھمک روچ مردم زور بیگواہ کنگ بوگ ءَ اَنت۔تھنا گوستگیں سال ءَ دو ھزار ءَ گیش مردم زوربیگواہ کنگ بوتگ۔ چوشیں گس پشت نہ کپتگ کہ اود ءَ چونیں ھم مردمے زور بیگواہ کنگ نہ بوتگ۔
آئی ءَ گوشتگ کہ بی وائی سی، وکیل، انسانی ھکانی ادارہ ءُ سول سوسائٹی گوستگیں چنچو سال اِنت ھمے گپ ءِ سر ءَ اوشتاتگ اَنت کہ زوریں بیگواھی ءَ ھچ وڑ ءَ نہ من ایں۔ زوریں بیگواھی نہ تھنا پاکستان ءِ آئین بلکیں اکوام متھدہ ءِ چارٹر ءِ رد ءَ یک ٹوھیں میارباری یے۔
آئیءَ گوشتگ کہ ما یک سیاسی گلے ءِ پارست ءَ زوریں بیگواھیاں ھوار بلوچ چکچینی ءِ ھمک بھرگ ءِ بگیری ءَ توار چست کنگ ءَ ایں۔ چونیں ھم مردمے پہ یک روچے ءَ زور بیگواہ کنگ بہ بیت دانکہ آمیدگس ءَ پیش کنگ نہ بوتگ ما آئی کیس ءَ جھان ءِ دیمءَ پاشک کن ایں۔ دانکہ ڈیھ ءَ آمیدگس چونیں ھم مردمے ءَ میاربار یا ناشرکار مہ گوش ایت ، گڑا چونیں ھم ادارھے ءَ پہ توپک ءِ زور ءَ اے وڑیں بھتام جنگ ءِ ھک نیست۔
آئی ءَ گوشتگ کہ اے وڑیں کانپرنس مارا چہ ریاستی زوراکیانی بگیری ءَ توار چست کنگ ءَ ھچ وڑ ءَ داشت نہ کنت۔ ایشی پژدر ءَ ما گیش مھکم بہ این ءُ شریں وڑے ءَ زوریں بیگواھی ءُ ریاستی زوراکیانی بگیری ءَ وتی جھد ءَ برجاہ دار ایں۔
