بلوچ نیشنل موومنٹ ( بی این ایم ) ءِ انسانی ھکانی ادارہ پانک ءِرسانکدری رھوتدار جمال بلوچ ءَ وتی شنگ کرتگیں تامربندے ءَ گوشتگ کہ پاکستانی پوج ءِ جارکش آئی ایس پی آر ءَ وتی پریس کانپرنس ءِ میان ءَ منیءُ مئے پارٹی ءِسروک ڈاکٹر نسیم بلوچ ءِ اکسانی اسکرین شارٹ داتگ ءُ مئے سر ءَ اسمان کازی ءِ کیس ءِ بابت ءَ بے بنیں بھتام جتگ ءُ چہ اسکرین شارٹا ں ھمے پیش دارگ ءِ جھد کرتگ کہ بلوچستانءَ چنچو کاروائی بوگ ءَ اِنت ما آیانی زمہ واریں ۔
آئی ءَگوشتگ کہ اسمان کازی ءِ کیس تچک ءَ زور بیگواھی ءِ کیسے ءُ پاکستانی آئین، میان استمانی کانود، اکوام متھدہ ءِ کانود ءِ بگیری اِنت ءُ زوریں بیگواھی ھچ وڑ ءَ منگ نہ بیت۔ چونیں ھم مردمے آوار جنگ بیت آ داں بیست ادار ءَ آمیدگس ءَ پیش کنگ بہ بیت۔ چونیں ھم توانمندے ءَاے ھک نیست کہ آ چونیں ھم مردمے ءَ بیگواہ بہ کنت۔
جمال بلوچ ءَ گوشتگ کہ اسمان کازی یازدہ اگست 2025 ءَ زور بیگواہ کنگ بوتگ ءُ ھژدہ اگست ءَ آئی زور گپتیں تامربند رسانکدر ءَ شنگ کنگ بوتگ کہ آ وت ءَ بی ایل اے ءِ مردم گوشگ ءَ اِنت۔ اے تامربند چہ پوج ءِ نیمگ ءَ پہ زور گرگ بوتگ ما اسمان کازی ءِ کیس ءَ انگت ءَ زور بیگواھی گوش این ءُ پہ آئی ھک ءَ گپ جن ایں۔
آئیءَ گوشتگ کہ اسمان کازی ءِ چہ آمیدگس ءَ پیش کنگءَ ساری اے تامربند پہ زور جوڑ کنگ بوتگ ایشی پاکستانءِ آئین نہ من ایت ءُ میان استمانی کانود ھم نہ من ایت۔
