بلوچستان لبریشن پرنٹ (بی ایل ایپ) ءِ جارکش میجر گھرام بلوچ ءَ وتی درشانے ءَ گوشتگ کہ بی ایل ایپ ءِ سرمچاراں ھپت جنوری ءَ مند ءَ زبیدہ جلال وانگجاہ ءَ زورگریں پاکستانی پوج ءِ نیمگ ءَ برجم دارگ بوتگیں دیوان ءِ وھد ءَ گوں گرنیڈ لانچراں اُرش کرتگ۔ سرمچاراں گرنیڈ لانچر ءِ لھتیں گولا آس داتگ کہ آ نشانگ ءَ لگ اِتگ اَنت۔ چہ ایشی آسر ءَ یک ایپ سی ءِ کارمندے ءَ ھوار دو کسٹم ءِ کارمند ٹپی بوتگ۔ اود ءَ اوشتاتگیں ایپ سی ءِ گاڑیاں ھوار آدگہ لھتیں گاڑی ھم تاوان بوتگ اَنت۔
آئی گوشتگ کہ اے دیوان زورگریں پوج ءِ ڈپٹی کمانڈنٹ کرنل آسپ ءُ ونگ کمانڈر کرنل کیسر ءِ چیردستی ءَ برجم دارگ بوتگ۔ اے دیوان ءَ بلوچستان اسمبلی ءِ کارکن برکت رند ءُ پدا ھکیم رند ءَ ھوار زورگریں پوج ءِ آدگہ ھندی چریک ھم ھوار بوتگ اَنت۔
جارکش ءَ گوشتگ کہ یک دگہ کاروائی یے ءَ بی ایل ایپ ءِ سرمچاراں شش جنوری ءَ دشت ءَ تُربَت، گْوادر ءُ کراچی ءَ روکیں سی پیک شھدگ بیگاہ ءِ ادار شش ءَ داں شپ ءِ ادار نُھ ءَ بستگ ءُ باز گاڑی پَٹ اِتگ۔ ھمے میان ءَ سرمچاراں نزیکیں پولیس چوکی انگیر کرتگ ءُ کارمند دزگیر کرتگ اَنت ءُ چوکی ءَ ایریں سرکاری درسیں سلاہ دستیگ کرتگ اَنت۔
آئی گوشتگ چوش کہ اے پولیس چوکی مھلوک ءَ گیشتر گاڑیاں دارگ ءُ دلسیاہ کنگ ءُ پہ زر گرگ ءَ جوڑ کنگ بوتگ ءُ چہ اے چوکی ءَ گپتگیں زر دمگ ءِ انتزامیہ ءَ دیگ بنت۔
جارکش ءَ گوشتگ کہ بی ایل ایپ ءِ سرمچاراں یک دگہ کاروائی یے ءَ ھپت جنوری ءِ بیگاہ ءِ ادار پنچ ءَ ھب چوکی ءُ وندر ءِ میان ءَ ٹوھیں شھدگ ءَ برجائیں کوسٹ گارڈ ءِ چوکی گوں دستی بمب ءَ نشانگ کرتگ۔ چہ ایشی آسر ءَ ایپ سی ءِ یک کارمندے ٹپی بوتگ ءُ چوکی تاوان بوتگ۔
جارکش ءَ گوشتگ کہ بی ایل ایپ ءِ سرمچاراں ھپت جنوری ءَ ناسرآباد ءَ زورگریں پاکستانی پوج ءِ نیمگ ءَ جتگیں چاریگی کیمرہ نشانگ کرتگ ءُ تباہ کرتگ اَنت۔
میجر گھرام بلوچ ءَ درشان ءِ گڈی ءَ مند، تُربَت ءُ ھب کاروائیانی زمہ واری من اِتگ۔
