شال ءَ پہ زوربیگواھیں مردمانی آجوئی ءَ توار چست کنوکیں گل وائس پار بلوچ مسنگ پرسنز (وی بی ایم پی) ءِ زھرشانی گدان ءَ 6050 روچ سرجم بوتگ کہ شال پریس کلب ءِ دیم ءَ برجاہ اِنت۔ چہ جتائیں بھرگاں سیادی داروکیں مردم گدان ءَ آتکگ اَنت ءُ گوں زوربیگواھیں کھولاں ھمدردی درشان کرتگ ءُ زوریں بیگواھی ءِ ھلاس کنگ ءُ پہ بیگواھیں مردمانی آجوئی ءَ دلجمی دیگ ءِ لوٹ کرتگ۔
وی بی ایم پی ءِ چیرمین نسراللہ بلوچ ءَ گوشتگ کہ آواران، بریت ءَ دزکپتگیں لاشانی کھولاں گل ءَ را گوشتگ کہ مئے مردم پوج ءَ زوربیگواہ کرتگ اَنت۔
آئی گوشتگ کہ کھول ءِ رد ءَ ایاز بلوچ ء دوست مھمد کولواہ ءِ ھند گیشکور سنڈم ءِ جھمنند اِنت۔ آ شانزدہ اکتوبر 2025 ءَ گوں امداد بلوچ نامیں ورنایے ءَ ھوار آوار جنگ ءُ بیگواہ کنگ بوتگ۔
آئی گوشتگ کہ ھمے وڑ ءَ زریپ اھمد ء مستری پکیر مھمد کہ کولواہ ءِ ھند مالار سیاہ کل ءِ جھمنند اَت ءُ 28 ستمبر 2025 ءَ پاکستانی پوج ءَ چہ گس ءَ آوار جنگ ءَ پد بیگواہ کرتگ۔ رند ءَ گوں زریپ ءَ ھوار دزگیر کنگ بوتگیں یک مردمے یل کنگ بوتگ اَت بلے زریپ اھمد ءِ بابت ءَ آئی کھول ءَ ھچ سرپدی نہ رستگ کہ نوں آئی لاش دزکپتگ۔
نسراللہ بلوچ ءَ زوربیگواھیں زریپ ءُ ایاز بلوچ ءِ لاشانی دزکپگ ءِ سر ءَ بژن درشان کرتگ ءُ گوشتگ کہ ڈیھ ءِ کانود ءُ اسلام اے چیز ءِ موکل ءَ نہ دنت کہ زندان ءَ بندیگیں مردم درکانودی کُشگ ءُ آیانی لاش چگلاں دیگ بہ بنت۔
آئی گوشتگ کہ اگاں کسے ھمے سرپد بیت چہ اے وڑیں گامگیج ءُ درکانودی رویشتاں بلوچستان ءِ جاور شر بنت، گڑا من سرپد باں کہ اے آیانی ردی اِنت۔
آئی گوشتگ کہ ڈیھ ءِ سلامتی ھمیشی ءَ اِنت کہ ریاست ءُ ریاستی ادارھانی سروگان اے جاوراں گوں سنگینی ءَ بہ زور اَنت کہ آ بلوچستان ءَ درکانودی گامگیجانی دارگ ءَ جوانیں کرد پیلو بہ کن اَنت۔
