بلوچ ریپبلکن پارٹی (بی آر پی) ءِ جارکش شیر مھمد بگٹی ءَ وتی شنگ کرتگیں درشانے ءَ گوشتگ کہ بگٹی ٹک ءَ چیپ آپ بگٹی ءِ نام ءَ ھچ وڑیں اگدہ نیست۔ لھتیں روچ پیش انچوش کہ سرپراز بگٹی چیپ آپ بگٹی ءِ نام ءَ سرکاری پاگ بندی کنگ بوتگ کہ ایشی ٹکی دودمان ءِ تہ ءَ ھچیں بستارے نیست۔
آئی گوشتگ کہ بگٹی ٹک چوناھا شش جتائیں ٹولیاں بھر اِنت کہ چہ آیاں یک بھرے مسوری اِنت کہ آ سے جاہ ءَ بھر بیت آئی تہ ءَ نوھکانی،بشکوانی ءُ جاپرانی ٹَکر ھوار اَنت۔
آئی گوشتگ کہ آ مردم ءَ کہ سرکار ءِ نیمگ ءَ چیپ آپ بگٹی گوشگ بوگ ءَ اِنت آ مسوری شاک ءِ سیمی ٹکر چہ جاپرانی ءَ سیادی دار ایت۔ جاپرانی ٹکر ءَ ٹکری (سروک) ءِ اگدہ ھست بلے اے یک جتائیں گپے کہ آئی سر ءَ ھم اے مردم ءَ جاپرانی شاک ءَ ٹکی دود ءِ رد ءَ گچین کرتگ یا اود ءَ ھم آ سرکار ءِ نیمگ ءَ گچین کنگ بوگ ءَ اِنت۔
آئیءَ گوشتگ کہ اگاں پنجاپ ءِ جھمنندیں پوجی سروکے سرپراز ءَ چونیں اگدھے دیگ لوٹ ایت گڑا شرتر ھمیش اِنت کہ انچوش آ مزن وزیر جوڑ کنگ بوتگ ھمے وڑ ءَ آئی ءَ پنجاپ ءِ چوھدری ءِ پاگ بندگ ءُآ چیپ آپ چوھدریز ءِ اگدہ ءَ بہ دنت بلے بلوچ دود ءُ بگٹی ٹک ءِ تہ ءَ پہ اے وڑیں مردماں ھچ وڑیں جاہ نیست۔
آئی گوشتگ کہ گوستانک اےگپ ءِ شاید اِنت کہ ھمے ریاست ءَ راج ءِ ڈاڈا شھید نواب اکبرھان بگٹی ءِ شھید کنگ ءَ پد پیسر ءَ ٹک ءِ نزام ءِ ھلاس کنگ ءِ جار جتگ۔ بلے لھتیں وھد ءَ پد میر آلی بگٹی ءَ یک پاگے بستگ ءُ آ یک سرکاری نوابے جوڑ کرتگ ءُ بگٹی ٹک ءِ سر ءَ ایب جنگ ءِ جھد کنگ بوتگ۔ وھدے کہ چہ ایشی ءَ ھچیں چیزے نہ بوتگ گڑا آ چہ اگدہ ءَ در کنگ بوتگ۔
