بلوچ نیشنل موومنٹ ( بی این ایم ) ءِ انسانی ھکانی ادارہ پانک ءَ نومبر 2025 ءِ رپورٹ شنگ کرتگ ءُ گوشتگ کہ اے ماہ ءَ پاکستانی پوج ءُ آئی چیریں ادارھاں 95 بلوچ زور بیگواہ کرتگ ءُ 20 درکانودی کشتگ۔
آئی ءَ گوشتگ کہ نومبر ءِ میان ءَ بلوچستان ءِ ھواری ءَ سندہ ءِ بنجاھی شھر کراچی ءَ ھم زوریں بیگواھی ءُ انسانی ھکانی لگتمالیانی ھال سر بوتگ۔ سرجم ءَ 95 مردم درکانودی آوار جنگ بوتگ کہ آیانی بابت ءَ کھول، وکیل ءُ آمیدگس ءَ پیش کنگ نہ بوتگ اَنت۔ آیانی تہ ءَ بیست ءُ یک مردم چہ بازیں سسائی ءُ جانی آزاراں پد یل کنگ بوتگ اَنت۔
رپورٹ ءِ رد ءَ نومبر 2025 ءَ کم چہ کم 20 شھری چہ جتائیں ھند ءُ دمگاں کشگ بوتگ، آیانی تہ ءَ مزدور، نودربر، ورنا ءُ کسانیں زھگ ھم ھوار اِنت۔ کیچ دمگ گیشتر سانمند بوتگ کہ اود ءَ گیش لاش دزکپتگ آیانی سر ءَ آزار ءُ تیرانی ٹپ گندگ بوتگ اَنت۔ یک نومبر ءَ تمپ ءِ میتگ کلاھو ءِ جاہ منند مزدور بھار بلوچ ءَ کیچ ءِ ھند دھات ءَ ریاستی کشندہ ٹولی ءَ داشتگ ءُ آئی پرپٹ ءُ سامان پل اتگ اَنت ءُ رند ءَ کشتگ۔ 2 نومبر ءَ یک شازدہ سالی نودربرے ابدرھمان یک دکاندارے آ دکان ءِ دیم ءَ تیر جنگ ءُ کشگ بوتگ۔
آئی ءَ گوشتگ کہ بلیدہ ءَ 29 اکتوبر ءَ ڈرون ارشے ءَ یکیں کھول ءِ چار ورنا زاکر، رازک، سادک ءُ پیرجان کشگ بوتگ اَنت۔ پاکستانی پوج ءِ اے ٹاپار ءَ رد کن ایں اے سلاہ بندیں مردم نہ بوتگ اَنت۔
رپورٹ ءِ رد ءَ ھندی مردم پہ پکنک ءَ جاڑین ءِ کوہ ءَ شتگ اَنت ڈرون ارش ءَ کودکیں شھری کشگ بوتگ اَنت۔ اے کشگ بوتگیں چاریں مردماں چہ پاکستانی پوج ءِ نزیکیں بنجل ءَ موکل ھم گپتگ کہ ما پکنک ءَ روگ ءَ ایں، آ موکل دیگ ھم بوتگ اَنت۔ ھوشاپ ءَ شانزدہ سالیگیں ورنا نسیم کادر شپ ءَ چہ گس ءَ آوار جنگ بوتگ ءُ دومی روچ ءَ تیرسپتگیں لاش دزکپتگ۔ میر دوست پروری 2025 ءَ زور بیگواہ کنگ بوتگ نُھ ماہ ءَ رند آئی آزار داتگیں لاش چہ تربت ءَ دزکپتگ۔
رپورٹ ءَ گوشگ بوتگ کہ پاروک نئیم اپریل ءَ چہ تلار ءِ چوکی ءَ بیگواہ کنگ بوتگ، ھپت ماہ ءَ پد چہ کیچ ءِ بانک چڑھائی ءَ آئی لاش دزکپتگ آئی جان ءَ آزارانی نشان گندگ بوتگ اَنت۔ ھمے جاہ ءَ زریپ بلوچ ءِ لاش دزکپتگ، آ مارچ 2025 ءَ آوار جنگ بوتگ اَت ءُ بندیگجاہ ءَ درکانودی کشگ بوتگ۔ ھژدہ نومبر ءَ گوک مند ءَ اسمائیل ابراھیم تیرگواری کنگ ءُ کشگ بوتگ، ھمے روچ ءَ چہ سوراب ءَ آوار جنگ بوتگیں اسمائیل بلوچ ءِ لاش دومی روچ ءَ چہ ھزادر ءِ ھند باگبانہ ءَ دزکپتگ۔
آئی ءَ گوشتگ کہ ایاز بلوچ چہ بلیدہ میناز وانگجاہ ءَ واتر روگ ءَ آوار جنگ بوتگ ءُ آئی لاش چہ ریکو ڈیم ءِ نزیک ءَ دزکپتگ۔ آ چہ گد ءُ چمپلاں پجارگ بوتگ۔ اجاز بلوچ ءَ پوج ءَ چہ کنچتی دشت ءَ آوار جتگ ءُ رند ءَ گوں ناگیگیں جاوراں نادارھجاہ ءَ برگ بوتگ آئی ٹپانی درد نہ سگ اِتگ ءُ بیران بوتگ۔ آدگہ مردمانی تہ ءَ جلال الدین، مھمد آلم ءُ امران ھوار اَنت، آ سور ءِ چن ءُ لانچ ءِ میان ءَ کشندہ ٹولی ءَ آوار جتگ ءُ دو کروڑ زر لوٹ اِتگ، چہ زرانی دیگ ءَ ابید آئی آزار داتگیں لاش چگل دیگ بوتگ۔
رپورٹ ءِ رد ءَ ماہ ءِ گڈی روچاں ابوبکر ءُ تاھر بلوچ ءِ لاش چہ کیچ ءِ جتائیں ھنداں دزکپتگ اَنت کہ آ چہ بازیں وھد ءَ بیگواھیں مردم بوتگ اَنت۔ 29 نومبر ءَ ھوشاپ ءِ ھند گروک بازار ءَ بوتگیں تیرگواری ءَ کسان سالیں زھگ یاسمین بلوچ ٹپی بوتگ اَت آ پہ الاج ءَ کراچی ءَ دیم دیگ بوتگ آئی ٹپانی درد نہ سگ اِتگ ءُ بیران بوتگ۔ دگہ سے زھگ ٹپی بوتگ۔
پانک ءَ رپورٹ ءِ گڈی ءَ لوٹ کرتگ ءُ گوشتگ کہ درسیں ویل شریں وڑے ءَ پٹ ءُ پول کنگ بہ بنت، اے ناشریانی زمہ وار جست گرگ بہ بنت ءُ بلوچستان ءَ میان استمانی انسانی ھکانی گلاں چارگ ءِ موکل دیگ بہ بیت دانکہ شھریانی بنکی ھک پھریزگ بہ بنت۔
