بلوچ نیشنل موومنٹ ( بی این ایم ) ءِ نیمگءَ شھید بانک کریمہ بلوچ ءِ شھیدی ءِ پنچمی سالروچ ءِ درگت ءَ شھید راشد ھنکین آواران ءِ نیمگ ءَ یک دیوانے برجم دارگ بوتگ۔ دیوان ءَ بی این ایم ءِ سینئر جوائنٹ سکریٹری کمال بلوچ ءَ تران کرتگ ءُ گوشتگ کہ کریمہ پہ گل ءِ کاراں شریں وڑے ءَ کار کرتگ ءُ گل مھکم کرتگ۔ اگاں ما پہ راھبند کار مکن ایں گڑا پشت کپ ایں۔ راھبندانی رد ءَ کار کنگ مارا منزل ءَ سر کنت۔
آئی ءَ ماما کدیر ءَ ستک شانی ندر کرتگ ءُ گوشتگ کہ ماما کدیر اچما ھما روچ ءَ گسر بوتگ کہ ھمے روچ ءَ بانک کریمہ شھید بوتگ۔ جھد ءِ پڑ ءَ بیران بوتگیں شھید گوشگ بنت آ چہ نادراھی ءَ بیران بہ بنت یا دگہ ویلے ءَ بہ بنت۔ ماما کدیر ءِ جھد پما تچکیں راھے۔ آئی تمردی ءَ یک مسالے زندگ داشتگ۔ اے جھد ءِ پڑ ءَ بازیں مردم بے توار بوتگ اَنت بلے ماما کدیر بے توار نہ بوتگ۔ بانک کریمہ ھر پیمیں جاورانی دیمپانی کرتگ گرم ءُ سارتی نہ چارتگ، ھمے وڑ ءَ ماما کدیر وتی زندگی ءَ یکشل ءَ جھد ءَ بوتگ۔ ھمے وڑ ءَ ماما کدیر یکشلیں جھد ءِ چیدگے اِنت۔
آئی ءَ گوشتگ کہ ھمک مردمے ءِ یک جتائیں بستارے بیت ءُ اے زرمبشت ءِ تہ ءَ ارزشت دار ایت۔ اے مئے وش بھتی اِنت ما انچیں اھدے ءَ زندگی کنگ ءَ ایں کہ اے اھد ءَ مئے لڑانی تہ ءَ ھستی ھست اَنت کہ آ وتی زندگی ءَ مئے سروکی ءَ کنگ ءُ نمیرانی ءَ پد ھم مئے سروکی ءَ کن اَنت۔
کمال بلوچ ءَ گوشتگ کہ بی این ایم ءِ گیشتریں سروکاں چہ بی ایس او ءَ دربرتگ ءُ بی ایس او پما درساں یک درسگاھے۔ پمشکا مارا اے زانگی اِنت کہ بی این ایم چہ بی ایس او ءَ دیمروئی کنوکیں یک مھکمیں پارٹی یے۔
اے دیوان ءَ چہ کمال بلوچ ءَ ابید آواران ھنکین ءِ جوائنٹ سکریٹری سگار بلوچ، شھید ناکو ھیر بکش بنزہ ءِ ڈپٹی سکریٹری سبیہ بلوچ، شھید ڈاکٹر منان بنزہ ءِ سکریٹری ودار بلوچ، شھید آگا آبد شاہ بنزہ ءِ سکریٹری رشید بلوچ ءُ زرمبش براھوئی ءِ شونکار زیشان منان ءَ تران کرتگ۔
آیاں گوشتگ کہ بلوچ یک انچیں راجے کہ آئی ھمک مردم ءَ یک داستانے گوں اِنت۔ اگاں انسان چونیں چیزے چو وتی ارواہ ءَ دوست بدار ایت گڑا آئی ءَ باز ارزشت دنت ءُ پمشکا ھرپیمیں جنجالانی دیمپانی ءَ کنت۔ سرڈگار ءِ انچیں مھرے کہ پہ ایشی پھریزگ ءَ ھزارانی کچ ءَ بلوچ ورنا، کماش، مرد ءُ جنیناں وتی جانانی دیمونی داتگ ءُ ھزارانی کچ ءَ بیگواہ اِنت۔
