بلوچ یکجھتی کمیٹی ءَ وتی شنگ کرتگیں درشانے ءَ ماما کدیر بلوچ ، پہ بلوچ ءِ ھکانی پدجنگءَ یک جھدکارے اَت۔ آ پہ بلوچ مھلوک ءَ پرایمنیں گھگیری، تمردی ءُ توکل ءِ رژائیں چیدگے اَت۔ آ پہ زوریں بیگواھیانی بگیری ءَ یکشل ءَ داں شانزدہ سال ءَ جھد کرتگ ءُ داں گڈی دم ءَ گوں توکل ءَ اے جھد برجاہ داشتگ۔
آئی گوشتگ کہ 2009 ءَ ماما کدیر بلوچ ءِ زھگ جلیل ریکی بیگواہ کنگ بوتگ۔ چہ ھما وھد ءَ ماما کدیر زوربیگواھیانی بگیری ءَ وتی جھد بندات کرتگ۔ رند ءَ جلیل ریکی ءِ لاش دزکپتگ بلے ماما نزور بوگ ءِ جاہ ءَ وتی اے جھد مھکم کرتگ ءُ گوستانکی راجی جھدے زندگ داشت۔
بی وائی سی ءَ گوشتگ کہ ماما کدیر بلوچ زند ءِ گڈی ساھت ءَ پہ زور بیگواھین مردم ءُ آیانی کھولانی مھکمیں توارے جوڑ بوتگ۔ آئی ھمک جاہ ءَ ھمک جنجلاں ابید چہ انساپ، راستی ءُ انسانی ھک ءِ لوٹ ءَ دزکش نہ بوت۔
آئی گوشتگ کہ مرچی اگاں ماما کدیر بلوچ مئے میانءَ ساڑی نہ اِنت، بلے آئی جھد، دیمونی ءُ پگر بلوچ راجی گوستانک ءَ پہ مدامی زندگ مان ایت۔ آ تھنا یک مردمے نہ بوتگ بلکیں یک زرمبشتے اَت۔ اے وڑیں زرمبشت آیوکیں پدریچاں لس مھلوک ءِ گھگیری، توکل ءُ جھد ءِ راہ ءَ پیش دار ایت۔
بلوچ یکجھتی کمیٹی ءَ گوشتگ کہ ماما کدیر بلوچ ءَ آئی اے گوستانکی جھد ءِ سر ءَ ستک شانی ندر کن ایں ءُ اے کول ءَ کن ایں کہ زوربیگواھی ءُ بلوچ چکچینی ءِ بگیری ءَ ماما کدیر بلوچ ءِ جھد ءَ گیش مھکم کن ایں ءُ شریں وڑے ءَ دیم ءَ بریں۔
