بلوچ وومن پورم ءِ سروک ڈاکٹر شلی بلوچ ءَ ماما کدیر ءِ بیرانی بابت ءَ وتی شنگ کرتگیں درشانے ءَ گوشتگ کہ اے پیر مردیں ماما کدیر بلوچ یکشلیں جھد ءِ چیدگ اَت، آئی ءَ وتی پیری ءُ نادارھی نہ چارت پہ بیگواھیں مردمانی آجوئی ءَ مدام جھد کنگ ءَ اَت۔
آئی ءَ گوشتگ کہ ماما بلوچ راج ءِ ھما توانائیں توار اِنت آئی ءِ روگ پہ بلوچ راج ءَ مزنے تاوانے ۔ ماما ھما پیر مرد اَت چہ 2009 ءَ بہ گر دانکہ گُڈی ساہ ءَ یکشل ءَ پہ بیگواھیں بلوچ مھلوک ءَ توار چست کنگ ءَ اَت ، اے دراجکشیں پانزدہ سالی ئیں سپر ءَ ماما ءَ وڑ وڑیں جیڑہ ءُ جنجالانی دیمپانی کتگ، بلے آئی ھمت مھکم بوتگ ءُ نزور نہ بوتگ چی ءَ کہ ماما پگری ھوالہ ءَ مھکمیں بلوچے اَت۔
ڈاکٹر شلی بلوچ ءَ گوشتگ کہ ھمے پیر مرد پہ بلوچ بیگواھیں مردماں شال ءَ بگر دانکہ اسلام آباد ءَ پیدل مارچ کنت ، ھپتاد سال ءِ امر ءَ یک گوستانکی لانگ مارچے کنت۔ ماما مرچی مئے میان ءَ ساڑی نہ اِنت ءُ جِتا بوتگ بلے آئی ءِ داتگیں پنت ءُ سر ءُ سوج مئے مُدام ھمراہ داری ءَ کن اَنت۔
آئی ءَ گوشتگ کہ ماما وتی پیرانسری ءَ ھمے پیش داشتگ کہ راجدوستی چی یے۔ چہ آئی ءِ روگ ءَ پد نوں اے ھمک بلوچ ءِ سر ءَ پرز بیت کہ آ ماما کدیر ءِ کاروان ءَ دیم ءَ بہ بارت۔
