چہ ھب چوکی ءَ چیریں ادارھانی کارمنداں زور بیگواھیں راشد ھسین ءِ برات ءُ انسانی ھکانی کارکن ماہ زیب بلوچ ءِ پت پروپیسر شپیک زھری یکبرے پد ءَ آوار جتگ ءُ بیگواہ کرتگ۔
اھوالکار ءِ رد ءَ شپیک زھری ء ابدلرسول کہ ھزدار ءِ ھند زھری ءِ جھمنند اِنت ءُ ھبدہ دسمبر ءِ نیمروچ ءَ چہ ھب ءَ ریکوری ءِ سنٹر ءَ چیریں ادارھانی کارمنداں آوار جتگ ءُ بیگواہ کرتگ۔
آئی زوریں بیگواھی ءِ گپ کھول ءَ راست کرتگ ءُ گوشتگ کہ چہ ایشی ءَ پیش ھم شپیک زھری 2013 زور بیگواہ کنگ بوتگ۔
پروپیسر شپیک زھری ءِ گھار پریدہ بلوچ ءِ گوشگ اِنت کہ منی یک براتے راشد ھسین 2018 ءَ چہ دبئی ءَ آوار جنگ ءُ بیگواہ کنگ بوتگ ءُ انگت بیگواہ اِنت۔ ما پیسر ءَ ھمے زوراکی ءِ آماچ ایں ایش نوں پما دگہ یک زوراکی یے۔
آئی ءَ گوشتگ کہ منی برات یک پر ایمنیں شھری یے آ گوں ھچ پیمیں درکانودی کاراں ھوار نہ بوتگ۔ من گوں بلوچ راج ءُ انسانی ھکانی ادارھاں لوٹ کن آں کہ اے گرانیں ساھت ءَ مئے گون ءَ بہ اوشت اَنت ءُ پہ منی براتانی آجوئی ءَ توار چست بہ کن اَنت۔
چوش کہ چہ شپیک زھری ءِ برات راشد ھسین ءِ زوریں بیگواھی ءَ پد آئی مات ءُ جنک ماہ زیب بلوچ پہ راشد ھسین ءِ زوریں بیگواھی ءَ یکشل ءَ جھد کنگ ءَ اَنت۔ بلوچستان ءِ جتائیں ھند ءُ دمگاں زھرشانی ءَ ابید داں اسلام آباد ءَ ھم زھرشانی ءَ شتگ اَنت۔
اے بابت ءَ ماہ زیب بلوچ ءِ گوشگ اِنت کہ گوستگیں ھپت سال بیت منی ناکو راشد ھسین بیگواہ اِنت ءُ من پہ آئی آجوئی ءَ جھد کنگ ءَ آں۔ پہ جھد ءِ پژدر ءَ من ایپ آئی آر، زندانی کنگ بوتگ آن ءُ منی نام ھم پورتھ شیڈول ءَ ھوار کنگ بوتگ ءُ منی بے توار کنگ ءِ باز جھد کنگ بوتگ۔ مرچی ریاستی چیریں ادارھاں یکبرے پد ءَ منی پت آوار جتگ ءُ بیگواہ کرتگ۔
آئی ءَ گوشتگ کہ من ریاست ءَ ھمے گوشگ لوٹ آں تو من ءَ ھچ وڑ ءَ بے توار کرت نہ کن ئِے۔ چی ءَ کہ تو زوراکی کرتگ ءُ من زوراکی دیستگ۔ اگاں من مرچی بے توار بباں تو باندا دگرے ءِ پت، برات ءُ زھگے بیگواہ کن ئِے۔ من دانکہ ھست آں اے زوراکی ءَ ھچ نہ وڑ ءَ نہ من آن ءُ ایشی بگیری ءَ توارچست کن آں۔
