بلوچ آجوئی لوٹوکیں رھشون ءُ بلوچستان لبریشن پرنٹ (بی ایل ایپ) ءِ سروک ڈاکٹر اللہ نزر بلوچ ءَ وتی شنگ کرتگیں درشانے ءَ گوشتگ کہ چین تچک ءَ بلوچ سرڈگار، تیاب دپ ءُ مڈیانی لٹ ءُ پل ءَ گوں پاکستان ءَ ھواری ءَ یک ٹوھیں ردی یے کنگءَ اِنت۔ بلوچ راج ءَ ھمے پیش داشتگ کہ بلوچستان ءَ راجی آجوئی ءَ پیش چونیں ھم شوربندی مھکم یا منگ نہ بیت، اگاں آ چونیں ھم دروشم یا چونیں ھم ریاستے ءِ نیمگ ءَ بہ بیت۔ گوستانک اے گپ ءِ گواہ اِنت کہ پہ زور سر ءَ داتگیں شوربندی نہ تھنا بے سوب بوتگ اَنت بلکیں داں دراجکشیں وھدے ءَ مھکم نہ بوتگ اَنت۔
آئی ءَ گوشتگ کہ پاکستان گوستگیں بیست سال اِنت بلوچستان ءَ چکچینی ءُ جنگی میارباری کنگ ءَ اِنت، گوں پاکستان ءَ اے کچ ءَ نزیک بوگ ءُ چین وت ءَ گوں آئی پالیسی ءُ کارپداں ھوار کنگ ءَ اِنت، اے انساپ، شرپ ءُ وتواکی ءِ وڑیں راھبندانی بگیری اِنت، ھما راھبند کہ چہ ایشی چین ءَ وتی مھلوک ءِ گوستانکی دراجشکیں جھدے کرتگ۔ ایشی پژدر ءَ چین ءَ بلوچستان ءِ بابت ءَ انوگیں پالیسی چینی راج ءِ دودمان ءِ ھلاسی ءَ پیش دار ایت۔
بلوچ رھشون ءِ گوشگ اِنت کہ ما تچک ءَ گوشتگ کہ بلوچ مھلوک چین ءَ تچک ءَ وتی دژمن سرپد نہ بیت۔ گوں پاکستان ءَ یکشل ءَ کمک کنگ ءَ الم چین ءَ گوں ھما گامگیج ءُ آسر ءَ ھوار کنت کہ پاکستان ءَ بلوچستان ءَ رویشت برجاہ داشتگ۔ اے گامگیج ءَ زوریں بیگواھی، درکانودی کوش، مچی سزا، ھندی مردمانی پہ زور لڈگ ءَ لاچار کنگ ءُ سرجمیں چاگرد ءَ گوں زوراکی ءُ ترسینگ ءَ بے توار کنگ ءَ پالیسی ھوار اِنت۔
ڈاکٹر اللہ نزر بلوچ ءَ گوشتگ کہ نوکنڈی چاگی ءَ بوتگیں چہ انوگیں ارش ءَ چین ءُ آدگہ دری باپاریں کمپنی سانمند بوتگ اَنت۔ آیاں اے ارش تھنا پاکستان ءِ سر ءَ نہ بلکیں ڈنی شریدارانی بگیری ءَ بلوچ ءِ یک پژدرے ءِ ھساب ءَ چارگ لوٹ ایت۔ ارش ھمے گپ ءَ منانک اِنت کہ بلوچستان ءَ چونیں ھم باپاری یے گوں بلوچ راجی آجوئی زرمبشت ءَ بندوک اِنت۔ زورگر ءِ چیردستی ءَ درسیں شوربندی بلوچ راج ءِ شھرگ ءَ گوں کارچ ءَ برگ زانگ بیت پہ ایشی گھگیری کنگ ھژدری اِنت۔
آئی ءَ گوشتگ کہ ما چین ءِ سروکاں زور دے ایں کہ آ پاکستان ءِ بابت ءَ بزاں بلوچستان ءِ درگتءَ وتی پالیسیاں گوں سنگینی ءَ بہ چار اَنت ءُ ھندی کارمند بلوچ آبادی ءِ سیاسی، مالی ءُ راجی لوٹانی مان نیارگ ءَابید آیاں ارزیشت بدے اَنت۔
بلوچ رھشون ءَ گوں یورپ، امریکہ ءُ پہ رودرآتکی میانی ڈیھاں وتی کلوہ ءَ گوشتگ کہ ما گوں میان استمانی تک ءَ ھمے لوٹ ءَ کن ایں آ بلوچ مھلوک ءِ ھکی ئیں آجوئی جھد ءَ بہ من اَنت ءُ ایشی پلہ مرزی ءَ زمہ واریں کرد ءَ پیلو بہ کن اَنت۔ بلوچستان ءِ آجوئی پہ درسیں راجاں تچک ءَ زمہ وار ءُ شرپمندیں شریدارے بیت ءُ آجوئی، انساپ ءُ انسانی شرپ ءِ بنکی راھبندانی شرپ ءَ کنت۔
