بلوچستان لبریشن پرنٹ(بی ایل ایپ) ءِ جارکش میجر گھرام بلوچ ءَ وتی شنگ کرتگیں درشانے ءَ گوشتگ کہ بی ایل ایپ ءِ سرمچاراں دوازدہ دسمبر ءِ نیمروچ ءِ ادار دوازدہ ءَ آواران ءِ شھر ءَ آرمی ءِ بریگیڈ ھیڈکوارٹر ءُ مزنیں بنجل نشانگ کرتگ اَنت۔ سرمچاراں مارٹر ءِ باز گولا آس داتگ کہ بنجل ءُ ھیڈکوارٹر ءِ تہ ءَ کپتگ اَنت۔ زورگریں پاکستانی پوج ءَ آواران شھر ءِ نزیکیں گسانی سر ءَ باز مارٹر ءِ گولا آس داتگ کہ آبادی ءِ تہ ءَ کپتگ اَنت۔
آئی گوشتگ کہ زورگریں پوج ءِ مزنیں بنجل ءِ کش ءَ پوج ءِ چیردستی ءَ ایپ سی ءِ وانگجاہ ءِ نام ءَ یک وانگی ادارھے جوڑ اِنت۔ مارٹر ءِ یک گولا یے ھمے ایپ سی وانگجاہ ءِ سر ءَ کپتگ۔ بی ایل ایپ چہ رسانکدرءِ کمک ءَ بلوچ مھلوک ءَ ھال دنت کہ اے وانگجاہ یک وانگی ادارھے ءِ گیش نہ پوجی درسگاھے کہ اود ءَ دری وانگ ءَ ھوار زھگاں چہ بلوچ زرمبشت، دود ءُ گھگیری لبزانک ءَ دور دارگ ءَ اِنت۔ اے نام ءِ وانگجاہ ءَ آیوکیں وھد ءَ بلوچ زھگاں پوجی ادارھاں ھوار کنگ ءِ یک شوربندی یے۔
جارکش ءَ گوشتگ کہ بی ایل ایپ گوں بلوچ کھولاں دزبندی کنت اے پندل سازیں شوربندی ءَ شری ءَ سرپد بہ بنت پرچا کہ اے گوں بلوچ ءِ پدریچ ءَ بندوکیں جیڑھے۔ اے ھم گُش ایں کہ مزنیں کاروائیانی وھد ءَ پوجی بنجلانی نزیک ءَ زھگانی تاوان بوگ ءِ ھم گمان بیت۔ اے ناگیگیں جاور اں سرپد بہ بہ اِتءُ بلوچ کھول وتی زھگاں چہ اے وڑیں ادارھاں دور بہ دار اِت۔
آئی گوشتگ کہ زی یک دگہ کاروائی یے ءَ بیگاہ ءِ ادار ھپت ءَ سرمچاراں آواران ءِ ھند کنیرہ ءَ پاکستانی پوج ءِ بنجل ءِ سر ءَ چہ سکا نزیک ءَ اُرش کرتگ۔ اُرش ءِبندات ءَ گوں راکٹ لانچراں بنجل نشانگ کرتگ۔ یک گولایے پوج ءِ پھازداریں سنگر ءِ سر ءَ کپتگ کہ چہ ایشی ءَ دو کارمند جاھی مرتگ۔ پد ءَ سرمچاراں ایل ایم جی ءُ اسنائپر توپک ءَ بنجل نشانگ کرتگ۔
جارکش ءَ گوشتگ کہ سرمچاراں چیریں ھالے ءِ پژدر ءَ یک دگہ کاروائی یے کرتگ ءُ یک شمبے ءِ روچ ءِ ادار یک ءَ تُربَت ءِ ھند آپسر ریسرچ پارم ءَ رھمدل ء اپزل تیرگواری کرتگ ءُ کشتگ۔ کشگ بوتگیں مردم تُربَت ءِ ھند آپسر ڈاکی بازار ءِ جھمنند اِنت کہ آ زورگریں پوج ءِ نزیکیں کارمندے بوتگ۔ رھمدل چہ ایشی ءَ پیش گوں زلھان ءَ ھوار کار کرتگ ءُ زلھان ءِ کوش ءَ پد آ ایم آئی ءِ یک دگہ کارمندے نسیر ءِ گون ءَ کار ءَ بوتگ۔ نسیر ءِ کوش ءَ پد آ تُربَت ءَ برجائیں ایم آئی ءِ کارگس ءَ کاراں تچک ءَ ھوار بوتگ۔
آئی گوشتگ کہ ایم آئی ءِ کارمند رھمدل بلوچ راجی زرمبشت آجوئی ءِ بگیری ءَ سرگرم بوتگ ءُ تُربَت شھر ءِ جتائیں ھنداں بلوچ ورنایانی زوریں بیگواھی، زورگریں پوج ءِ سروکی ءَ جتائیں چاگردی سلکاریاں ھوار بوتگ۔
میجر گھرام بلوچ ءَ درشان ءِ گڈی ءَ پاکستانی پوج ءِ سر ءَ دو اُرش ءُ ایم آئی ءِ کارمند ءِ کوش ءِ زمہ واری من اِتگ ءُ گوشتگ کہ ھمے کول ءَ کن ایں کہ زورگریں پوج ءُ آئی کمکاراں داں بلوچستان ءِ آجوئی ءَ نشانگ کن ایں۔
