ریاز: سئودی اَرب ءِ وزیر ءِ ھج ءَ اے سال ءِ ھج ءِ بابت ءَ جار جتگ ءُ گْوشتگ کہ اے سال ءَ بس سئودی ءِ جند ءِ مردم ءُ سئودی ءَ جھمنندیں دری ڈیھانی مردم ھج کُرت کن اَنت۔چہ دگہ ڈیھاں کس ءَ پہ ھج ءَ آھگ ءِ موکل دیگ نہ بیت۔
سئودی ءِ وزیر ءِ ھج ءَ گْوشتگ کہ سرجمیں جھان کورونا وائرس ءَ مان پتاتگ ءُ وائرس ءِ نوکیں تھر تُرسناک اِنت پمشکہ ھاجیانی کچ کم کنگ بیتگ۔ سئودی ءِ وزیر ءِ ھج ءَ ھاجیانی کچ ءِ جارجتگ ءُ گْوشتگ کہ اے سال ءَ بس 60 ھزار مردم ءَ ھج کنگ ءِ موکل دیگ بیت ءُ اے دُرسیں مردم سئودی ءِ وتی ءُ سئودی ءَ نشتگیں دری ڈیھانی مردم ھوار بنت۔
سئودی ءِ وزیر ءِ ھج ءَ گْوشتگ کہ پہ ھج کنوکاں ھژدری اِنت کہ آ دگہ مادراھی یے ءِ آماچ مہ بنت۔ایشی ءَ ابید ھج کنوکانی اُمر 18 داں 65 سال بہ بیت ءُ ھما مردم ھج کُرت کن اَنت کہ آیاں کورونا ٹکہ جتگ۔
