یورپی پارلیمنٹ ءَ جی ایس پی پلس ءَ ” یورپی یونین کی خاموشی مفاہمت “ ءِ بنگپ ءَ یک کانپرنس ءُ پلم اسکریننگے برجم دارگ بوتگ۔ اے میان استمانی کانپرنس ءَ بلوچ نیشنل موومنٹ ( بی این ایم ) ءَ ھم بھر زرتگ ءُ بلوچستان ءَ پاکستان ءِ انسانی ھکانی بگیریانی بابت ءَ منانک پیش کرتگ ءُ لوٹ کرتگ کہ انسانی ھکانی ناھکیں بگیریانی سر ءَ پاکستان ءِ جی ایس پلس ءِ درگت ءَ دوبر چارگ بہ بیت۔
بی این ایم ءَ ھمے میان استمانی پورم ءَ گوشتگ کہ انسانی ھکانی گنتریں بگیریاں ابید پاکستان ءِ جی ایس پلس ءِ ارزیشت یورپی واک ءِ بگیری اِنت۔
اے درگت ءَ بلوچ نیشنل موومنٹ ( بی این ایم ) ءِ چیئرمین ڈاکٹر نسیم بلوچ ءَ تران کرتگ ءُ گوشتگ کہ زوریں بیگواھی بلوچستان ءَ چہ درساں مستریں جیڑھے۔ تھنا 2025 ءِ گڈی سے ماھانی میان ءَ 234 نوکیں کیس دیم ءَ اتکگ۔ چہ جنیناں نسرینہ بلوچ ءُ ماہ جبین بلوچ ھمے سال ءَ آوار جنگ بوتگ اَنت کہ داں انوں بیگواہ اَنت۔ گوستگیں سے ماہ بیت کہ سی ٹی ڈی ءُ ریاست ءِ چیردستیں کشندہ ٹولی ءَ 22 مردم درکانودی کشتگ۔ آیانی تہ ءَ چنچو مردم زور بیگواھیں بوتگ اَنت۔
آئی ءَ گوشتگ کہ گوستگیں دو دھک اِنت کہ ھزارانی کچ ءَ بلوچ زور بیگواہ کنگ ءُ ھزارانی کچ ءَ بیگواھیں مردم کشگ بوتگ اَنت۔ چہ جتائیں ھنداں ھواریں کبر گندگ بوتگ اَنت۔ دشت ءَ شال ءِ نزیک ءَ یک کبرستانے ھست کہ آ پجار نہ بوتگیں مردمانی کبر گوشگ بیت۔ اود ءَ سدانی کچ ءَ پجار نہ بوتگیں مردم کل کنگ بوتگ اََنت۔
آئی ءَ یورپی پارلیمنٹ ءِ جھگیرانی نیمگ ءَ دلگوش گور کرتگ ءُ منت گپتگ کہ شما مرچیگیں دور ءِ چہ درساں گیش بے تواری ءَ رنج اوپار کنوک، نہ ترسیں بلوچ راج توار جتگ۔ شمئے ساڑی بوگ تھنا یک چیدگے نہ اِنت اے جھان ءَ ھمے کلوہ ءِ سر کنگ اِنت کہ رنج سیمسرانی پشت ءَ چیر دیگ نہ بنت ءُ انسانی شرپ مدام یک میان استمانی جیڑھے اِنت۔
بی این ایم ءِ چیئرمین ءَ گوشتگ کہ من مرچی شمئے دیم ءَ تھنا بلوچ نیشنل موومنٹ ءِ جھگیر ءِ بستار ءَ نہ بلکیں یک انچیں گواھے آں کہ چہ دھکاں برجاھیں انسانی ھکانی لگمتالی ءَ گوں وتی چماں گندگ ءَ آں۔ اے زوراکی یکشل ءَ گیش بوگ ءَ اِنت۔
ڈاکٹر نسیم بلوچ ءَ بلوچ یکجھتی کمیٹی ءِ بگیری ءَ ریاستی زوراکیانی سر ءَ گپ جتگ ءُ گوشتگ کہ چہ مارچ 2025 ءَ پد بلوچ یکجھتی کمیٹی ءِ باسک یکشل ءَ ترسینگ، دزگیر کنگ ءُ دروگیں کیسانی بنیاد ءَ بندیگ کنگ بوتگ اَنت۔ آ پر ایمنیں روانک ءُ مھلوک ءِ مچی ءِ سر ءَ ھم زوراکی کن اَنت۔
آئی ءَ گوشتگ کہ انوگیں ماھاں جاور گنتر بوتگ اَنت۔ پاکستان ءَ بلوچستان ءَ ارش کنوکیں ڈرون دیم داتگ کہ آ شھری ھنداں نشانگ کنگ ءَ اَنت۔ زھری ءَ ڈرون اُرش ءَ چار زھگاں ھوار باز شھری بیران بوتگ۔ ھما کہ چہ میتگانی چوکیاں ترس آماچ بوتگ اَنت نوں چہ آزمان ءَ ھم ترس اَنت۔ اے ناشرکارانی بگیری ءَ کاروائی نہ اِنت کودکیں شھریانی بگیری ءَ نوکیں سلاہ کارمرز بوگ ءَ اِنت۔
بی این ایم ءِ چیئرمین ءَ گوشتگ کہ جانی آزارانی ھواری ءَ پاکستان ءَ بلوچستان ءَ سیاست ءِ سر ءَ ھم سرجم ءَ پابندی جتگ۔ پرایمنیں زھرشانی ھم میارباری یے جوڑ کنگ بوتگ۔ مچیانی سر ءَ ھم پابندی جنگ بوگ ءَ اِنت ءُ سروک درانڈیھ یا کشگ بنت۔
