بلوچستان سرکار ءِ نیمگ ءَ بلوچ آجوئی لوٹوکیں گلانی سروک ءُ کمانداراں ھوار سے سد ءَ گیش مردمانی بگیری ءَ کاروائی کنگ ءِ پیسلہ کنگ بوتگ۔
چہ بلوچستان سرکار ءِ نیمگ ءَ یک جارے ءَ گوشگ بیتگ کہ اے پیسلہ چہ بلوچستان مزن وزیر سرپراز بگٹی ءِ سروکی ءَ دیوانے ءَ کنگ بوتگ۔
جار ءَ گوشگ بوتگ کہ دیوان ءِ میان ءَ بلوچ لبریشن آرمی (بی ایل اے) بلوچستان لبریشن پرنٹ ( بی ایل ایپ) یونائیٹڈ بلوچ آرمی ( یو بی اے ) بلوچ ریپبلکن گارڈ ( بی آر جی ) بلوچ ریپبلکن آرمی (بی آر اے) ءُ لشکر بلوچستان ءِ سروکانی بگیری ءَ یاداشت کرتگیں کیس ءِ تیز کنگ ءِ پرمان دیگ بوتگ۔
بلوچستان ءِ مزن وزیر سرپراز بگٹی ءَ سرکار پرمان داتگ کہ تھی ءُ دری کارانی تک ءِ کمک ءَ انٹرپول ءِ رد ءَ اے کاروائی تیز کنگ بہ بیت۔
بلوچستان ءِ مزن وزیر ءِ گوشگ اِنت کہ پہ ناشرکاری ءِ گِر ءُ دار ءَ کاروائی چہ ھواریں کمکاراں بگر دانکہ گلانی سروکانی بگیری ءَ پروونشل ایکشن پلان ءِ گائیڈ لائن ءِ پارست ءَ کاروائی کنگ بہ بیت۔
درشان ءَ گوشگ بوتگ کہ دیوان ءِ میان ءَ درانڈیھ ءَ نشتگیں گلانی سروک ءُ ھندی کمکارانی گپانی توار بند ءُ دگہ منانک پیش کنگ بوتگ ءُ چہ ایشی ءَ پد درانڈیھ ءَ نشتگیں گلانی سروک ءُ ھندی کمکارانی بگیری ءَ کاروائی کنگ ءِ پیسلہ کنگ بوتگ۔
