بلوچ یکجھتی کمیٹی ءَ وتی شنگ کرتگیں درشان ءَ گوشتگ کہ بلوچ یکجھتی کمیٹی ءِ چیردستی ءَ شمبے ءِ دوازہ ءَ شاھوانی اسٹیڈیم شال ءَ مچی سرجم ءَ پر ایمنیں وڑے ءَ برجم دارگ بیت۔ پہ ایشی لّس مردم ءُ کارکنانی سر ءَ مزنیں زمہ واری یے بیت کہ آ سروکانی پنتانی سر ءَ دلگوش بہ کن اَنت ءُ آدگراں ھم ھمے پنتانی سر ءَ کار کنگ ءِ بہ گوش اَنت۔ مچی سرجم ءَ ایمن ءُ مھکم بیت۔
آئی ءَ گوشتگ کہ مچی ءَ سیاسی پارٹیانی بیرکانی آرگ ءُ چنڈینگ ءِ سر ءَ گوں ترندی ءَ پابندی جنگ بیت۔ لّس مردم ءُ کارکن گوشگ بنت کہ آ وتسریں اوگام مہ جن اَنت ءُ اگاں کجام اوگام تلو ءِ نیمگ ءَ جنگ بیت ھمائی پسو ءَ بہ دے اَنت۔ وتی آدگہ سروک ءُ چہ ڈن ءَ آتکگیں مھماناں سکا گوں شرپ، گوں مھر ءُ دلگوش ءَ گوش بدار اَنت۔
آئی ءَ گوشتگ کہ درسیں مردماں گوشگ بیت کہ آ بی وائی سی ءِ کارکنانی گون ءَ کمک بہ کن اَنت۔ یکے دومی ءِ گون ءَ گوں نرمی ءَ پیش بہ بنت، پہ پھازداری ءَ واکدار ءُ پولیس کمک کنت، آیانی گون ءَ گوں شرپ ءَ پیش بہ بہ اِت۔
آئی ءَ گوشتگ کہ وھد وھد ءِ سر ءَ سروک ءُ کارکنانی نیمگ ءَ چے کہ گوشگ بیت آیاں گوش بدار اِت۔ مچی جاہ ءَ سلاہ ءِ آرگ ءُ پہ چکاسگ ءَ ھچ وڑیں تاوان دیوک، پہ ناشرکاری ءَ کارمرز بیوکیں چیزانی سر ءَ پابندی جنگ اِنت۔
آئی ءَ گوشتگ کہ مچی جاہ ءَ اگاں چونیں شکی ئیں مردم یا ٹولی یے گندگ بوت گڑا زوت بی وائی سی ءِ کمکار ءُ پولیس سھی کنگ بہ بنت۔ مچی جاہ ءَ ھچ وڑیں دیوال نبیسی ءِ دور کنگ یا کجام ھم سیاسی پارٹی ءِ بیرک ءِ دور کنگ ءِ سر ءَ سرجم ءَ پابندی اِنت۔
آئی ءَ گوشتگ کہ پہ پھازدادی ءِ درگت ءَ ترّ ءُ گرد، پہ پٹ ءُ پول کنگ ءَ گوں کارکناں کمک بہ کن اِت۔ بلوچ راج ءِ یکجاھی ءُ بلوچ چکچینی ءِ بگیری ءَ اے راجی مچی ءَ شمئے کمک کنگ راجی کمکے زانگ بیت۔
آئی ءَ گوشتگ کہ چہ یک نمبر دروازگ ءَ مانشجاہ ءِ نیمگ ءَ تیوک ءَ جنین مچی جاہ ءَ پتر اَنت ءُ دو نمبر دروازگ ءَ کہ ملک نور دگ ءِ نیمگ ءَ چہ اود ءَ مردین مچی جاہ ءَ پترگ ءِ موکل دیگ بنت۔
