بلوچستان ءَ انسانی ھکانی لگتمالیانی سر ءَ پانک ءَ اکتوبر 2025 ءِ رپورٹ شنگ کرتگ ایشی ءِ تہ ءَ سرجمیں بلوچستان ءَ پاکستان ریاست ءِ ناشرکاری، زوریں بیگواھی ءُ درکانودی کوش ھوار اَنت۔
رپورٹ ءِ رد ءَ ریاستی ادارہ ءُ آئی سروکی ءَ کار کنوکیں کشندہ ٹولی بلوچستان ءِ جتائیں دمگاں لس شھریاں نشانگ کنگ ءُ انسانی ھکاں یکشل ءَ لگتمال کنگ ءَ اَنت۔ رپورٹ ءَ چہ کراچی ءُ ڈیرہ گازی ھان ءَ ھمے وڑیں ویلانی گپ جنگ بیتگ کہ آ ھمے چیز ءَ پدر کنت کہ اے تباھی ریاستی پالیسی ءِ بھر اِنت۔
رپورٹ ءِ رد ءَ اکتوبر ءِ ماہ ءَ ھشتاد ءُ ھپت مردم بیگواہ کنگ بیتگ۔ گیشتریں ویل، کیچ، پنجگور، ھزدار ءُ ڈیرہ بگٹی ءَ بیتگ اَنت۔ ایشانی تہ ءَ گیشتریں مردم چہ گساں بیڑ برگ، راھاں دارگ ءُ بازاراں آوار جنگ بیتگ اَنت۔ ھژدہ مردم چہ جانی ءُ سسائی آزار دیگ ءَ پد یل کنگ بیتگ۔
رپورٹ ءِ رد ءَ 20 مردم درکانودی کشگ بیتگ کہ آیانی تہ ءَ گیشتریں مردم پاکستانی پوج ءِ دست ءَ زور بیگواھیں مردم بیتگ اَنت۔ چہ جتائیں ھنداں دزکپتگیں لاشاں تیرانی ٹپ، آزارانی نشان بیتگ ءُ آیانی دست بندوک بیتگ اَنت۔ کشگ بیتگیں مردمانی تہ ءَ جھانزیب بلوچ ھوار اِنت کہ 28 ستمبر ءَ چہ پَسِنی، ببر شور ءَ آوار جنگ بیتگ ءُ یک اکتوبر ءَ چہ لسبیلہ ءِ زیرو پوائنٹ ءِ نزیک ءَ آئی تیرسپتگیں لاش دزکپتگ۔ ھمے وڑ ءَ کدوس بلوچ، نیک سال ءُ نزر بلوچ سے ئیں سیمسر ءَ کارکنوکیں ڈرائیور اَنت 30 ستمبر ءَ چہ بلیدہ ءُ پروم ءَ زور بیگواہ کنگ بیتگ اَنت ءُ دومی روچ ءَ آیانی لاش چہ سوراپ ڈیم ءِ نزیک ءَ دزکپتگ اَنت۔
چہ واشک ءَ دکاندار مھمد آزم یازدہ ستمبر ءَ آوار جنگ بیتگ ءُ شش اکتوبر ءَ آئی لاش چہ ناگ، گوارگ ءَ دزکپتگ۔ چہ پنجگُور پروم ءَ پکیرجان 18 اکتوبر ءَ پاکستانی پوج ءُ کشندہ ٹولی ءَ آوار جتگ ءُ دو روچ ءَ پد آئی لاش دزکپتگ۔ چہ ایشی ءَ ابید زھور اھمد 20 اکتوبر ءِ شپ ءَ آوار جنگ بیتگ ءُ دومی روچ ءَ آئی لاش چہ پروم نگور کئور ءِ نزیک ءَ دزکپتگ۔ یک نومبر ءَ ابدلھالک ءِ لاش دزکپتگ کہ آ لھتیں روچ پیش آوار جنگ بیتگ، نجیب اللہ یک سرکاری وانگجاھے ءِ نوکرے 30 اکتوبر ءَ ریاست ءِ جوڑ کرتگیں کشندہ ٹولی ءِ کارمنداں کشتگ۔
رپورٹ ءِ رد ءَ نازیہ شپی ءِ کیس ھوار اِنت کہ 28 اکتوبر ءِ شپ ءَ پاکستانی پوج ءُ کشندہ ٹولی ءِ کارمنداں گس ءَ بیڑ برتگ نازیہ، آئی مات ءُ برات آوار جتگ۔ دومی روچ ءَ نازیہ گوں ناگیگیں جاوراں دزکپتگ کہ آئی ٹپانی درد نہ سگ اِتگ ءُ بیران بیتگ۔
چہ ڈیرہ بگٹی ءَ سے زور بیگواھیں مردم جمیل بگٹی، پیرجان بگٹی ءُ ھازر بگٹی 17 اکتوبر ءَ سی ٹی ڈی ءَ یک دروگیں میڑے ءَ کشتگ اَنت۔ منانکانی رد ءَ جمیل ءُ پیرجان مارچ 2025 ءَ پوج ءَ آوار جتگ اَنت ءُ پد ءَ دروگیں میڑ ءَ کشتگ اَنت۔
رپورٹ ءَ دو مزنیں برزی اُرش ھم ھوار اِنت کہ پنچ اکتوبر ءَ زھری ءِ ھند مولاچاری ءَ پاکستانی پوج ءَ یک برزی ارشے ءَ شش مردم کشتگ اَت کہ آیانی تہ ءَ منزور اھمد، آئی دو زھگ، آئی برازتک بی بی رھیمہ ءُ آئی زھگ ھوار اَنت۔ سے دگہ مردم ٹپی بیتگ۔ اکتوبر ءِ گڈی ءَ شال ءِ ھند چلتن ءِ کوہ ءَ برزی ارشے ءَ نُھ ورنا ٹپی بیتگ اَت کہ آ پہ پکنک ءَ شتگ اَنت۔ آیانی نام جھانزیب مھمد شھی، امران سمالانی، مکبول اھمد، زاھد بلوچ، دولت ھان، ارباب بلوچ، رپیک لھڑی ءُ واجد بلوچ اِنت۔
رپورٹ ءِ گڈی ءَ گوشگ بیتگ کہ زوریں بیگواھی، آزار دھی، درکانودی کوش، برزی ارشانی گیش بوگ، بلوچستان ءَ انسانی ھکانی تباھی ءَ پاشک کنت۔ انسانی ھکانی پدجنوک، پٹ ءُ پولی کمیشن، چہ میان استمان ءِ سروکی ءَ پوج ءَ جست بہ کن اَنت دانکہ لس شھری چہ بے مھاریں ریاستی زور ءُ زوراکیاں پھریزگ بہ بنت۔
