شال: پہ زوربیگواھیں مردمانی آجوئی ءَ وائس پار بلوچ مسنگ پرسن ءِ زھرشانی گدان ءَ 6014 روچ سرجم بوتگ شال پریس کلب ءِ دیم ءَ برجاہ انت۔ جتائیں بھرگاں سیادی داروکیں مردم گدان ءَ آتکگ اَنت ءُ گوں کھولاں ھمدردی درشان کرتگ۔
وی بی ایم پی ءِ چیرمین نسراللہ بلوچ ءَ گوشتگ کہ زوریں بیگواھی ڈیھ ءِ کانود ءُ انسانی ھکانی لگتمالی اِنت۔ مئے دراجکشیں پرایمنیں جھد ءِ مول ھم ھمیش اِنت کہ زوریں بیگواھی گر ءُ دار کنگ بہ بیت۔
آئی گوشتگ کہ مئے گل ءِ لوٹ اِنت کہ پہ درسیں بیگواھیں مردمانی آجوئی ءَ دلجمی دیگ بہ بیت۔ کسے ءِ سر ءَ بھتام ھست آئی ءَ وتی سپائی پیش کنگ ءِ ھک دیگ بہ بیت۔ زوربیگواھی ءُ درکانودی کوش ءِ درچ پہ مدامی ھلاس کنگ بہ بیت ءُ پہزوربیگواھی ءِ جیڑہ ءِ گیش ءُ گیوار کنگ ءَ راھبند ءِ رد ءَ کانود سازی کنگ بہ بیت۔
