نسیر کبدانی لبزانکی دیوان ھاران ءِ ماھی دیوان 28 نومبر ءِ بیگاہ ءِ چار ءَ پروپیسر ھاجی نور الھک شاہ ءِ پاگواجھی ءَ گل ءِ کارگس ءَ جم دارگ بوتگ۔ دیوان ءِ مھمان مھمد بکش آسکانی بوتگ ءُ جارچین ڈاکٹر شکور زاھد بوتگ۔
دیوان ءِ بندات ءَ گل ءِ بازیں جیڑھانی بابت ءَ گپ ءُ تران بوتگ ءُ گوں شور ءُ سلاہ ءَ پد پیسلہ کنگ بوتگ کہ زوت گل ءِ نیمگ ءَ چھاپ بوتگیں کتابانی دیمدرائی ءَ دیوانے جم دارگ بیت ءُ آؤکیں ماہ ءِ دیوان یکشمبے ءِ سھب ءَ برجم دارگ بنت۔ ھمے وڑ ءَ اے شور هم بوتگ کہ پہ گل ءِ کاران یک کاردارے دارگ بیت۔
دیوان ءِ مھمان ءَ گل ءِ سنگتانی منت گپتگ ءُ تران کنان ءَ گُوشتگ کہ نسیر کبدانی لبزانکی دیوان ءِ کار ستاہ کرز اَنت ءُ اے گل پہ ھاران ءِ وانندگ ءُ ورناھاں یک جوانیں لبزانکی ءُ وانگ ءُ زانگی بُنجلے۔
دیوان ءِ گڈسر ءَ شیئر بوتگ کہ شائراں وتی شیئر ءُ پربند الھان کرتگ اَنت۔ اے دیوان ءَ پروپیسر حاجی نور الھک شاہ ،پروپیسر تاھر الاھی، پروپیسر جلال پراک ،کیوم سادگ،مھمد بکش آسکانی، ڈاکٹر شکور زاھد ،لال جان وپا، مسئود پنڈگ،مھمد ایسا مھمد ھسنی، ممتاز بھار،شھزاد سلیم، گنی ھسرت، پدا کبدانی، آسپ نور ،بابا نوشروانی،ارسلان نوشروانی ، نجیب ھسنی ،رزا کبدانی ءُ پرھاد نور ساڑی بوتگ اَنت۔
دیوان ءَ گل ءِ کمک کارمستر سپر ھان راسکوھی ءِ ترو(ناکو ءِ جنین) ءِ بیران بوگ ءَ دلپدردی درشان کرتگ ءُ آئی ءِ ارواہ ءِ آسودگی ءَ دوا لوٹ اِتگ۔
