بلوچ راجی رھشون ءُ بی ایل ایپ ءِ سروک ڈاکٹر اللہ نزر بلوچ ءَ بلوچ اسٹوڈنٹس آرگنائزیشن ءِ پنجاہ ءُ ھشتمی سالروچ ءِ درگت ءَ آیانی جھد ءَ را مراد باتی داتگ ءُ گوشتگ کہ چہ مرچی ءَ بیست ءُ سے یا بیست ءُ چار سال پیش سی ءُ پنچ مردماں اے کاروان بندات کرتگ، ایشی تہ ءَ ھزارانی کچ ءَ ورنا ھوار بوتگ اَنت ءُ پہ آجوئی جھد ءِ دیم ءَ برگ ءَ وتی ھر وڑیں جھد ءُ کوشست کرتگ۔ لُمہ کریمہ، شپی جان ءُ آدگہ سنگتانی شھیدی ءُ زاھد جان، لکمیرجان ءُ زاکر جان ءَ ھوار ھزارانی کچ ءَ سنگتانی بندیگی ءَ ھمے گپ پیش داشتگ کہ بلوچ ءِ ورنا بچک ءُ جنک آجوئی ءِ جھد ءَ پوہ بوتگ اَنت، زمین ءِ پھازداری ءَ پوہ بوتگ اَنت۔
آئی ءَ گوشتگ کہ مستریں چیز وتی زانگ اِنت کہ ما کسے اے آجوئی ءِ پڑا کجام ءَ جاہ ءَ گوں مھکمی ءَ کار کرت کن ایں۔ دومی اے یک سسائی، ھنر ءُ زانشت ءِ جنگے۔ مئے جنگ ءِ یک رکے نہ اِنت اے یک سیاسی جنگے ما چہ سیاست ءِ پارست ءَ وتی جنگ ءَ دیم ءَ برگ ءَ ایں۔
بلوچ رھشون ءَ گوشتگ کہ من پھر بنداں ھما ورنا بیست ءُ سے سال پیش اے جھد ءَ ھوار بوتگ اَنت مرچی آجوئی جھد ءِ ھمک پڑا آ سروکی کنگ ءَ اَنت۔ من ءَھمے اوست اِنت کہ ورنا کتاباں ھوار جھد ءِ آدگہ تک ءُ پھناتاں وت گیشین اَنت۔ ھرچ جنگے بیت آ جنگ راجاں ردوم دنت، راجانی گوستانکاں ردوم دنت،راجانی دود ءُ ربیدگاں ردوم دنت۔ راجانی زبان ءَ ردوم دنت۔
ڈاکٹر اللہ نزر بلوچ ءَ گوشتگ انچوش کہ مرچی رسانکدر ءِ دور اِنت۔ اے دور ءَ گوگل لاچار اِنت کہ آ بلوچی ءَ یک زبانے ءِ بستار ءَ بہ زور ایت۔ پمشکا کہ زورگ بوتگ کہ آ باز کارمرز کنگ بوتگ۔ من ءَ ھمے اوست اِنت کہ سنگت پہ براھوئی زبان ءَ جھد کن اَنت۔
آئی ءَ گوشتگ کہ اے جنگ مرچیگیں جنگے نہ اِنت ءُ ما ھم سرجم ءَ کامل نہ ایں، آشوب در آشوب ءِ سر ءَ مئے ایمان اِنت۔ مئے جھدکار ءُ سنگت ما وت کہ زندگی ءِ ھمک پڑا ھست ایں اے جھد ءَ دیم ءَ بر ایں۔ شما کہ پدریچ اِت گیشتر وانوک ءُ زانوگر اِت شمئے تہ ءَ گیشتر بودناکی ھست، شمئے تہ ءَ زانشت، ھنر، سیاست ءُ درسیں چیز ھست اَنت۔ مرچی باندا جنگ ھما جاہ ءَ سر اِنت کہ ما یک جنگے کنگ ءَ ایں مئے سنگتانی جھد ءُ گل یک ریاستے ءِ وڑ ءَ اِنت۔ ھمے کہ ورنا گل اَنت چہ آیاں بلوچ ءِ آجوئی جھد بلوچ ءِ سرڈگار ءِ ھمک کنڈ سانمند کرتگ۔ چہ بلوچستان ءَ ڈن جاہ منندیں بلوچان ءَ سانمند کرتگ۔ اد ءَ بلوچ ورنا گل ءِ یک مزنیں کمک ءُ توانے ھوار اِنت۔
بلوچ رھشون ءَ گوشتگ کہ سنگت وتی جند ءَ پجہ بیار اَنت، وتی جھد، راج ءُ دژمن ءَ ھم پوہ بہ بنت۔ ھما وھد ءَ کہ شما وتی ءُ دژمن ءِ توانمندی ءُ نزوری زانت بزاں سوب شمئیگ اِنت۔ مرچی چہ شمئے ھمے جھد ءِ برورد ءَ ھمے رستر مئے زالبولاں آوار جنگ ءُ کشگ ءَ اَنت۔ چی ءَ کہ ھمک وھد ءَ زواک چہ زانشت ءَ ترس ایت۔
ڈاکٹر اللہ نزر بلوچ ءَ گوشتگ کہ من گوں شما یک کسانیں دزبندی یے کہ شما کسان کسانیں جاگھاں وتی پروگراماں بہ کن اِت۔ کسان کسانیں نیٹورکانی تہ ءَ مردماں تبلیگ بہ کن اَت۔ پنتاک بھر ءُ بانگ بہ کن اِت ءُ دیوال نبیسی بہ کن اِت۔ شما ھرچی کرت کن اِت، شما رسانکدر ءَ پہ بلوچ راجی آجوئی ءَ کارمرز کن اِت چی ءَ کہ شمئے کِر ءَ ھنر ھست۔ گوں سیاسی کارکن ءُ جنگولاں ھوار مارا آئی ٹی ٹیکنالوجی انگت ءَ گیش درکار اِنت۔
آئی ءَ گوشتگ کہ من ھمے اوست ءَ داراں کہ سنگتاں ھما جھد بندات کرتگ ایشی ءِ تہ ءَ سنگت ءُ سروک شھید بوتگ اَنت من جزماں کہ سنگت اے جھد ءَ داں آسر ءَ بر اَنت۔
