کراچی: نوکاپ لبزانکی مجلس ءِ اِمبری داد دیوان 23 نومبر 2025 ءَ بلوچی زبان ءِ کواس ءُ شائر اسھاک ھاموش ءِ شرپ ءَ ماں بلوچ ویلپیئر سوسائٹی پکیر کالونی کراچی ءَ برجم دارگ بوتگ۔ اے دیوان ءِ مھمان اسھاک ھاموش ءُ سرمستر مسکان مجید بوتگ۔ اے دیوان دو بھرانی تہ ءَ بوتگ۔ اولی بھر گُشتانکی ءُ دومی بھر شیئر ءُ شائری۔ دیوان ءِ اولی بھر ءِ جارچین بکتاور امیر ءُ دومی بھر ءِ شئیب رھیم بوتگ۔
دیوان ءِ اولی بھر ءَ میر ساگر رھمان ءُ گلام رسول کلمتی ءَ واجہ اسھاک ھاموش ءِ شائری ءُ لبزانکی کارانی سر ءَ تْران کُرتگ۔ میر ساگر رھمان ءَ اسھاک ھاموش ءِ شائری ءِ سر ءَ تْران کنان ءَ گُوشتگ که اسھاک ھاموش شائری ءِ ھما مردمان اِنت که مارشتانی زبان ءَ سرپد اِنت، پدا شائری ءِ بُنگپ ھم اَنچیں اَزیت ناکیں لبزاں گوں گْرنچ دَیگ بیتگ که آئی ءِ اَندر ءَ بید ء اَندوه ءُ مارشتاں دگه ھچ چیز جاگه کرت نه کنت۔
دیمتِر ءَ میر ساگر ءَ گوُشتگ که بُن اَسل ءَ اسھاک ءِ شیئری درشان گیشتر دستونک اِنت، البت درمیان ءَ چندیں لچّهے ھم پِربستگ، بلئے چوش که دستونک آئی ءِ شُناس ءِ بھرے جوڑ بوتگ، لچّه آ رنگ ءَ آئی ءِ ٹَپّانی درمان نه بیتگ۔
ھمے رنگ ءَ گلام رسول کلمتی ءَ وتی ھیال درشان کرتگ اَنت ءُ گوُشتگ که اسھاک ھاموش ماں بلوچ راجمان ءَ گیشتر په شائری ءَ نامدار اِنت۔ شائری راجانی گوں مزنیں مڈّیاں ھساب کَنگ بیت، په زبان ءَ شائری چه زِند ءِ مستِریں لوٹاں یکے۔ شائری لبزاں سَمبھینیت ءُ زبان ءِ تک ءُ پَھناتاں پْراه تِر کنت۔ زبان ءِ گلستان ءَ شائری پُلانی پیم ءَ اِنت۔ ھَمُک شائر ءِ شائری ءِ وتی یک رنگے، چه ھمے رنگ ءَ واجہ اسھاک ءِ شائری ءِ جتائیں رنگے۔
دیوان ءِ اولی بھر ءِ ھلاسی ءَ رند یک کسانیں ساز ءُ زیملی بَھرے ٹَھینگ بوتگ که اِشی ءِ تَہ ءَ بشیر ھیات، ناسر ءُ شئے نسرت ءَ گوں وتی اِزم ءَ دیوان وش کرتگ۔
دیوان ءِ دومی بھر شائری بوتگ کہ دیوان ءِ دومی بھر ءِ مھمان اسھاک ھاموش ءُ ھسن الی ھسن بوتگ اَنت ءُ سرمستر زپر کریم بوتگ۔ اے بَھر ءَ مُھب بسمل، جام پکیر، امتیاز کمال، سمین گلام، کامران ھیدر، جاسب جهان، سید مھمد پکیر، یاسر کریم، ملناز منیر، سهیل میرانی، رھمان آزگ، بشیر بشارت، سرور آدم، ایسا بلوچ، میر ساگر رھمان، ھسن الی ھسن، اسھاک ھاموش ءُ زپر کریم ءَ شیئر ونتگ۔
