بلوچستان آجوئی سنگر( بی ایل ایپ) ءِ جارکش میجر گھرام ءَ تربت ءَ گچینکاری بنجاہ ءِ سر ءَ اُرش ءِ زمہ واری منّ اِتگ ءُ گْوشتگ کہ سرمچاراں کیچ ءِ بنجاھی شھر تربت ءَ پاکستان ءِ گچینکاری پتر ءِ دمگی کارگس ءِ سر ءَ اُرش کُرتگ۔
آئی ءَ گْوشتگ کہ پنچ شمبے ءِ روچ ءِ دو ءَ تربت ءَ گچینکاری پتر ءِ دمگی کارگس ءِ سر ءَ سرمچاراں دستی بمب اُرشے کُرتگ ءُ تہ ءَ گْوستگ اَنت۔کارگس ءِ تہ ءَ دو نیمگی تیرگْواری ءَ یک پولیس کارمندے مُرتگ۔
جارکش ءَ گْوشتگ کہ سرمچاراں ساڑی ئیں سَے پولیس کارمندانی سلاہ ھم دستیگ کُرتگ اَنت۔
میجرگھرام ءَ گْوشتگ کہ پاکستان ءِ گچینکاری زورگِپتیں بلوچستان ءِ زورگری ءِ برجاہ دارگ اِنت۔ ما چہ راج ءَ دزبندی کن ایں کہ گچینکاری ءَ بھر مہ زور ایت۔ ریاست ءِ گچینکاری ءَ بھر زوروک ریاست ءِ ایردستی ءِ منّوک اِنت۔
بی ایل ایپ ءِ جارکش ءَ گْوشتگ کہ مئے کڈن کنگ ءَ ابید پولیس ءُ آدگہ جھلی ادارہ زورگریں پاکستانی لشکر ءِ دست ءَ کارمرز بیگ ءَ اَنت، زیکیں اُرش ءَ مُرتگیں پولیس کارمند ءَ گھگیری کُرتگ ءُ سرمچارانی سر ءَ تیرگْواری کُرتگ،سرمچارانی تیرگْواری ءَ مُرتگ۔
آئی ءَ گْوشتگ کہ ما یکبرے پد ءَ پولیس ءَ ھوار دُرسیں لشکر ءَ کڈن کن ایں کہ گچینکاری ءِ ھمک بُنجاہ سرمچارانی نشانگ ءَ اَنت، بھر زوروک وتی جان ءُ مال ءِ زمہ وار وت اَنت۔
