بلوچ شھیدانی سالروچ ءِ درگت ءَ بلوچ نیشنل موومنٹ ( بی این ایم ) ءِ نیمگ ءَ کیچ گْوادر ھنکین ءَ یک مراگشے برجم داشتگ۔ اود ءَ پارٹی ءِ باسکاں بازیں کچے ءَ بھر زرتگ۔ دیوان ءِ مھمان بی این ایم ءِ رسانکدری ءُ دودمانی کارگشاد کازی داد مھمد ریھان بیتگ۔ آئی ءَ 13 نومبر ءِ گوستانکی پژدر ءُ شھیدی بنگپ ءِ سر ءَ تران کرتگ ءُ گوشتگ کہ مارا شھیدی ءِ سوب، گھگیری ءِ ارزیشت ءُ آئی مول سرپد بوگ لوٹ ایت۔ پہ ایشی چہ میر مھراب ھان ءَ بگر داں چیئرمین زبیر بلوچ ءَ وتی جان ببا داتگ۔
آئی ءَ گوشتگ کہ بلوچ ءِ ھان ءَ زانتگ کہ بلوچستان ءَ اے جاورانی تہ ءَ اوشتگ، ربیتی دیمپانی نزام، سردارانی گھگیری، نزوریں سرکار ءُ کسانیں سلاھانی گون ءَ گوں انگریز ءِ مھکمیں پوج ءَ دیم پہ دیمی کنگ نہ بیت، بلے پد ءَ ھم چہ سلاھانی چگل دیگ ءِ جاہ ءَ آئی گھگیری کنگ ءِ پیسلہ کرتگ۔
آئی ءَ گوشتگ کہ بلوچ ھان ءَ زانتگ کہ راج چہ مرگ ءَ ھلاس نہ بنت، چہ سرجھلی ءَ ھلاس بنت۔ اگاں گھگیری مہ بیتیں گڑا بلوچ راجی گوستانک ءَ پہ مدامی ملامتی اَت۔ 13 نومبر ءِ گھگیری ءُ شھیدی مرچی ھم پہ بلوچ سرڈگار ءَ مڑگ ءِ جوزگ ودی کنگ ءَ اِنت۔
کازی ریھان ءَ گوشتگ کہ جھد مدام پہ مول ءَ کنگ بنت ءُ مئے مول بلوچستان ءِ آجوئی اِنت۔ وھدے کہ دژمن ءَ ھمک پڑا پروش بدے این ءُ آئی نپاں تاوان بدے ایں وتی تاوان ءَ کم کرت بہ کن ایں گڑا سوبمند بہ ایں۔ اے جھد پہ جنت ءِ لالچ ءَ نہ اِنت بلکیں پہ بلوچستان ءِ آجوئی ءَ اِنت کہ اود ءَ مئے پدریچ گوں آجوئی ءُ انساپ ءَ زند بہ گوازین اَنت۔
بی این ایم کیچ گْوادر ھنکین ءِ کماش بابا جی آر بلوچ ءَ گوشتگ کہ مرچی بلوچ پہ سرڈگار ءِ آجوئی ءَ وتی ھوناں ریچگ ءَ ایں دانکہ بلوچ وتی سرڈگار ءِ آجوئی ءَ بہ گیت ءُ گوں وتی راجی پجار ءَ وتی سرڈگار ءِ واھند بہ بیت۔ بلوچ چہ وتی شھیدانی ھون ءُ دیمونیاں شمشوکار نہ بیت ءُ نہ ما چہ شھیدانی لیکہ ءَ پد کنز بہ بہ ایں۔ دیمونیانی درچ داں بلوچستان ءِ آجوئی ءَ برجاہ بیت۔
بی این ایم کیچ گْوادر ھنکین ءِ کارگشاد جیئند بلوچ ءَ گوشتگ کہ اے جھد داں ھما جاہ ءَ سر کنگی اِنت کہ مئے سروکاں داں اود ءَ سر بوگ ءَ بے کساس دیمونی داتگ۔ مرچی ھم استاد واھد کمبر ءُ آدگہ سنگت زنداناں آزار اوپار کنگ ءَ اَنت بلے دژمن ءِ دیم ءَ سرجھل کنگ ءَ نہ اَنت۔ استاد واھد کمبر ءَ گوشتگ اَت کہ پارٹی ءُ ادارہ مئے پدریچ ءِ مانزمان اَنت ءُ بلوچ بوگ ءِ جوزگ مارا جھد کنگ پرمائیت۔
