کیچ ءِ ھند شاپک ءِ جاہ منند ءُ چہ شال ءَ پاکستانی پوج ءِ دست ءَ زور بیگواہ کنگ بیتگیں نودربرانی کھولاں تُربَت پریس کلب ءَ پریس کانپرنس کرتگ ءُ گوشتگ کہ 28 اگست ءَ مئے پنچ زھگ چہ شال ءِ ھند ایسا نگری ءَ یکجاہ ءَ آوار جنگ ءُ بیگواہ کنگ بیتگ کہ داں مرچی آیانی ھچ وڑیں ھال نیست۔
آیانی گوشگ اِنت کہ مئے زھگانی نام ءَ شاہ بیک ء ماسٹر اسلم، کدیر ء للّا، اکرم ء ماسٹر تکسیر، کدیر ء پلین ءُ مھمد یاسین ء مسکان اِنت۔ سدام ء مھراب جولائی ءَ چہ جوسک ءَ آوار جنگ بیتگ۔
آیانی گوشگ اِنت کہ ما باز بر ءَ کمشنر، ڈپٹی کمشنر ءُ آدگہ ادارھانی کِر ءَ شتگ ایں ءُ وتی پریات برتگ، بلے چار ماہ ءِ زوریں بیگواھی ءَ ابید مئے زھگ آجو کنگ بوگ ءَ نہ اَنت ءُ آیانی بابت ءَ مارا ھچ وڑیں سرپدی دیگ نہ بیتگ۔
آیاں گوشتگ کہ اگاں مئے زھگ داں سے روچ ءَ یل کنگ نہ بوت اَنت گڑا ما تالیمی چاراہ، کمشنری دگ ءَ ھوار آدگہ دگاں بند کن این ءُ زھرشانی کن ایں۔
