بلوچ اسٹوڈنٹس ایکشن کمیٹی ءِ نوک گچین بیتگیں چیئرمین ءَ پریس کانپرنس کرتگ ءُ گوشتگ کہ مئے گل ءِ چارمی لس دیوان بلوچ لبزانکار اتا شاد، آزاد جمالدینی ءُ بلوچ جنینانی نام ءَ برجم دارگ بیتگ۔ ایشی سروکی پیشیگیں چیئرمین شبیر بلوچ ءَ کرتگ سے روچی لس دیوان ءَ دو روچ ءَ بندیں کوٹی ءَ دیوان ءُ یک روچے سوگندی دیوان بیتگ۔ee
آئی ءَ گوشتگ کہ اے میان ءَ گل ءِ جتائیں بنگپانی سر ءَ گپ ءُ تران ءَ پد نوکیں بنجاھی کابینہ گچین کنگ بیتگ۔ ازیر بلوچ چیئرمین ءُ پیرجان بلوچ کارگشاد گچین کنگ بیتگ۔ آدگہ گچین بیتگیں اگدہ دارانی تہ ءَ کمک سرکماش الی بلوچ، کمک کارگشاد تنویر بلوچ ءُ رسانکدری کارگشاد پھد بلوچ ھوار اِنت۔
آئی ءَ گوشتگ کہ بنجاھی لس دیوان ءِ سیمی روچ ءَ کیچ ءَ سرکٹ ھاؤس ءَ سوگندی دیوان برجم دارگ بیتگ کہ ایشی جتائیں بھرگاں سیادی داروکیں ورنا ءُ مھماناں بھر زرتگ۔
دیوان ءَ تران، کتابانی دیمدرائی، گل ءِ کتاب نوشت ءُ زھگانی کتاب گام ءِ پیش کنگ، اتا شاد ءُ آزادی جمالدینی ءِ سر ءَ ڈاکومنٹری ءُ بلوچی ساز ءُ زیمل ھم ھوار بیتگ اَنت۔
ازیر بلوچ ءَ تران کرتگ ءُ گوشتگ کہ گل جمھوری درچ ءِ توان اِنت ءُ کارکنانی بیسہ ءَ مارا یک دگہ مزنیں راجی زمہ واری یے داتگ۔
آئی ءَ گوشتگ کہ بساک ءَ بلوچ نودربر چہ لیکھی تباھی ءَ کش اِتگ اَنت ءُ یک مچی مارشت، زانشت ءُ کتاب ءِ نیمگ ءَ دلگوش داتگ اَنت اے گل ءِ سکا مزنیں سوبمندی یے۔
آئی ءَ بلوچستان ءَ گیش بیوکیں نشہ آماچی، ورنایانی ترسینگ، وانگجاھانی جنجال ءُ سائنسی آسراتی ءِ کمی ءِ سر ءَ بژن درشان کرتگ ءُ گوشتگ کہ گل آھوکیں دو سالانی میان ءَ سائنسی سرگرمی، کتاب میڑہ ءُ لٹریری پیسٹیولانی پارست ءَ زانشتی ءُ لیکھی پڑا جھد ءَ گیشتر مھکم کنت۔
آئی ءَ گوشتگ کہ بساک ءِ واھشت یک زانشت، باسما ءُ سائنسی بنیاد ءَ دیمروئی کنوکیں بلوچ چاگردے ءِ جوڑینگ اِنت ءُ اود ءَ بلوچ ورنایانی سروکی کنگ ءُ بھر زورگ ھژدری اِنت۔
چیئرمین ءَ گوں لس مھلوک ءُ ورنایاں لوٹ کرتگ کہ آ اے زانشتی سپر ءَ گل ءَ کمک بہ کن اَنت دانکہ بلوچستان ءَ یک باسمائیں پدریچے دیم ءَ آرگ بہ بیت۔
