نیشنل ڈیموکریٹک پارٹی (این ڈی پی) ءِ جارکش ءَ بلوچستان ءِ شھیدانی روچ ءِ درگت ءَ وتی شنگ کرتگیں درشانے ءَ گوشتگ کہ سیزدہ نومبر تھنا بلوچستان ءِ شھیدانی روچ نہ ھان مھراب ھان ءُ آئی سنگتانی دیمونیانی گیر آرگ ءِ روچ اِنت بلکیں اے بلوچ راجی پدریچ، دیمونی ءُ گھیگری ءِ گوستانکے روچے۔ اے روچ ھمک بلوچ شھید ءِ گیر آرگ ءِ روچ اِنت کہ آئی پہ وتن، راج ءُ پجار ءَ وتی جان داتگ۔
آئی گوشتگ کہ بلوچستان ءِ شھیدانی روچ بے کساسیں دیمونی ءُ جھد ءِ چیدگ اِنت۔ اے روچ مارا ھمے کول ءِ یات ءَ دنت کہ بلوچ راج مدام زوراکی ءِ بگیری ءَ اوشتاتگ ءُ گھگیری کرتگ۔ 1839 ءَ بگر داں مرچی اے دیمونیانی یک بے کساسیں گوستانکے ھست کہ آئی بلوچ راجی زانت زندگ داشتگ۔ نواب ھیربکش مری ءِ پگری ءُ سیاسی لیکہ ءِ سر ءَ کار کنگ ءُ راجی نپ ءَ چہ وتی زاتی نپ ءَ گیش دوست دارگ راستیں راجدوستی اِنت۔
آئی گوشتگ کہ مرچی ئیں وھد ءَ ھر بلوچ کہ آ نودربر بہ بیت یا کہ وکیل، استاد یا مزدور، ڈاکٹر بہ بیت یا کہ دھکان ءُ یا کہ آ سرکاری نوکر بہ بنت درسانی سر ءَ اے زمہ واری بیت کہ آ گوں راجی پگر ءَ بندوک بہ بنت ءُ پہ آیوکیں پدریچاں یک شرپمندیں ءُ وتواجھیں پدریچے ءِ بنیاد ءَ ایر بہ کن اَنت۔
جارکش ءَ گوشتگ کہ بلوچستان ءِ سرزمین شھیدانی امانت اِنت۔ آئی کوہ، کوچگ، کئور ءُ پٹ ءُ زر بلوچ راج ءِ پجار ءُ پھر ءُ شان ءِ بھر اَنت۔ اے گلزمین ءِ مڈی، گیس ءُ زر ءِ مادن ءَ پُر اِنت کہ آیانی واھند تھنا بلوچ راج اِنت۔
جارکش ءَ گوشتگ کہ این ڈی پی بلوچ راجی ھک، سیاسی وتواجھی، پگر ءِ مھکمی ءُ شھیدانی مشن ءِ آسر کنگ ءَ وتی جھد ءَ برجاہ داریت، چی ءَ کہ ھمے بلوچستان ءِ شھیدانی روچ ءِ تچکیں کلوہ ءُ راجی زمہ واری اِنت۔
