بلوچ وومن پورم ءِ سروک ڈاکٹر شلی بلوچ ءَ سیزدہ نومبر ءِ بابت ءَ وتی شنگ کرتگیں درشانے ءَ گوشتگ کہ مرچی ما ھما سراں پہ شانے یاد کنگ ءَ ایں کہ آیاں نہ تھنا وتی جند ابدمان کُتگ بلکیں وتی زندگی ءِ درستیں واھشت گٹگیر کُتگ اَنت ءُ راجی وشیں بانداتے ءِ واھگ دل ءَ بستگ ءُ جنزاں بوتگ اَنت ءُ آیاں شپ ءُ روچ پہ زمین جیڑ اتگ۔ چہ وتی زات ءَ درکپتگ اَنت، زندگی ءِ ھرپیمیں سکی، سوری ءُ جنجالانی دیمپان بوتگ اَنت۔ آیاں نہ تھنا وتی جند پہ زمین ءُ راج ءَ ندر کُتگ بلکیں وتی لوگ ءُ جاگھ، کھول پہ زمین ءُ راج ءَ ببا داتگ اَنت۔
آئیءَ گوشتگ کہ چہ وتی زات ءَ در کپگ ارزان نہ اِنت، ھما مردم چہ وتی زات ءَ در کپ اَنت کہ آ وتی راج ءُ زمین ءِ ارزشت ءَ سرپد بنت۔ ھما مردم ءَ گوں وتی زمین ءَ اشک بوت گڑا آئی کِر ءَ زاتی سیادی ھچ مانا نہ دار اَنت۔باید اِنت کہ مرچیگیں روچ ءِ بابت ءَ ما تھنا وتی نمیرانیں سراں پہ ادارکی یاد مکن ایں بلکیں گوں آیاں اھد ءُ پیماں کنگ ءِ روچ اِنت۔
ڈاکٹر شلی بلوچ ءَ گوشتگ کہ مرچی مارا نواب مھراب ھان ءِ سر ءَ پھر بندگی اِنت کہ آئی انگریز ءِ وڑیں تاکتوریں دژمنے ءِ گون ءَ جنگ داتگ ءُ نیمران بوتگ بلے دژمن ءِ دیم ءَ سرجھلی کبول نہ کُت۔ مارا چو نواب مھراب ھان ءُ آدگہ شھیدانی وڑ ءَ تمرد بوگی اِنت۔
آئی ءَ گوشتگ کہ گوں راجی شھیداں ھوار مارا اے گپ الم دل ءَ آرگی اِنت کہ راجی جنز تھنا گوں یک ٹک ءُ کبیلھے ءَ دیم ءَ نہ جنز اَنت پمشکا مارا وت ماں وتی ھسد ءُ کینگ ھلاس کنگی اَنت ءُ درستیں بلوچ راج یکمشت ءُ یکجاہ کنگی اِنت ءُ گوں وتی گاماں برگی اِنت۔
ڈاکٹر شلی بلوچ ءَ گوشتگ کہ اے روچ ءِ بابت ءَ من گوں وتی درستیں بلوچ پارٹی ،ورنا گل ،سیول سوسائٹی ،لیبر یونین ءُ ایدگہ بلوچ گلاں دزبندی کن آں کہ آ پہ راجی سیت ءُ نپاں ھور ءُ تپاک بہ بنت، اگاں ما تپاک بوتیں گڑا جھان ءِ ھچ زور مارا پروش دات نہ کنت۔
